Mbledhja e Kryesisë, PS zyrtarizon kandidatët për kryetar në 5 bashki!

Kryesia e Partisë Socialiste ka publikuar sot kandidatët zyrtar për kryetar të 5 bashkive me të cilët do të futet në garën e 6 Marsit. Pas mbledhjes së Kryesisë, Sekretari i Përgjithshëm i Partisë Socialiste, Damian Gjiknuri foli për emrat e përzgjedhur ndërkohë për Lushnjen pritet të vendoset të martën.

“Kryesia e PS bëri një mbledhje dhe konkludoi me kandidaturat. Ne Durrës vendosëm të rikonfirmojmë Emirjona Sakon. Ka justifikuar me punën e saj këtë përgjegjësi. Kryesia e PS u nis nga parimet që figurat të jenë të pastra, i mirëpresin qytetarët dhe janë bërë me konsultime me qytetaret. Jemi të gatshëm të hyjmë në zgjedhje dhe është një moment i mirë për të fituar të gjitha bashkitë,” tha Gjiknuri

Drejtuesja politike e Qarkut Shkodër, Edona Bilali, ka konfirmuar kandidaten zyrtare të PS për Bashkinë Shkodër.

“Në Bashkinë Shkodër do të dalim me kandidaten Majlinda Angoni që aktualisht mban pozicionin e perfektes së qarkut,” tha Bilali ndërsa Drejtuesi politik i Qarkut Dibër, Ulsi Manja, zbuluar kandidatin e PS për këtë bashki.

“Jam këtu për kandidatin që do të kandidojë në zgjedhjet e 6 marsit. PS mori në analizë kandidaturat e dhëna nga unë. U konludua që kandidati do të jetë Rrahim Spahiu. Është njeri me vizion, Dibra ka një shans e do të ketë në krye një person me integritet. jam i bindur që do të bëjmë punë të mirë.”

Drejtuesi politik i Qarkut Tiranë, Erion Veliaj, zbuloi emrat e kandidatëve të PS për Bashkitë Vorë dhe Rrogozhinë.

“Në Rrogozhinë do të vijojmë me Edison Memollën. Një djalë fantastik. Sot Rrogozhina është dhe pjesa e bregdetit, janë ndërthurur të gjitha. Ndaj do të vazhdojmë të mbështesim Edisonin, e mezi pres që si në Vorë dhe Rrogozhinë të kemi rezultate të mira. Në Vorë kemi pasur disa drejtues e duam të jetë një faktor unifikues, i kemi besuar një mësuesi. Blerim Shera do të jetë kandidat për Vorën,” tha Veliaj.

E paqartë ngelet situata në Bashkinë e Lushnjes, për të cilën Drejtuesi politik i Fierit, Taulant Balla, e pranoi se kryetarja aktuale Eriselda Sefa është njëra nga kandidatet por vetëm të martën do të zyrtarizohet kandidati.

“Po, është e vërtetë që është një prej kandidatëve (Eriselda Sefa), por nuk dua të hyj sot në emrat, do ta quaja një lloj strategjie, për shkak se unë jam drejtues politik prej një kohe të shkurtër në qarkun e Fierit.,” tha Taulant Ballla plotësisht në delir duekpretenduar edhe fitoren në Shkodër ndërsa përfundon:

“PS garon për t’i fituar 6 bashkitë. Ne konkurrojmë për të fituar në Shkodër. Jam prej muajit shtator drejtues politik në qarkun e Fierit dhe në mekanizmin e përdorur për të konsultuar, përveç konsultimeve të drejtpërdrejta, me shoqërinë civile, me sipërmarrjen, me fermerët, por në një mënyrë të përgjithshme dhe me popullin. Emrin do ta keni shumë shpejt, ditën e martë.”