Mbledhja e Qeverisë, Edi Rama: Të premten flasin inxhinierët, më pas riparimet…

Kryeministri Edi Rama në mbledhjen e sotme të jashtëzakonshme për situatën e krijuar pas tërmetit tragjik të 26 Nëntorit tha se ka filluar identifikimi i apartamenteve që do të merren me qira nga shteti, ku do të qëndrojnë ata që nuk kthehen dot në banesa pasi u janë dëmtuarit.

Të gjithë këta qytetarë, sipas Edi Ramës, Krishtlindjet dhe Vitin e ri do ti kalojnë në këto hotele dhe më pas do të nisë akomodimi i tyre nëpër apartamente.

“Është domosdoshmëri përgatitja e fazës së akomodimit për ata që janë sot në hotele dhe për ata që janë në zonën rurale. Kam një merak shumë të madh për ata që janë në zonën rurale lidhur me nevojën për tu garantuar cilësi maksimale të tendave. Ministria e Mbrojtjes po punon çdo ditë së bashku me drejtuesin e plotfuqishëm , ministrin e turizmit dhe shtabin e emergjencave në Durrës e Lezhë.”

Për ata që janë në hotele, Kryeministri u shpreh:

“Ka filluar përpilimi i listave për ata që nuk kthehen dot në shtëpi që janë në hotel. Duhet të fillojë identifikimi i të gjitha apartamenteve për tu marrë me qira nga shteti. Nuk do ti çojmë në kampe, nuk do ti çojmë në çadra. Por do ti çojmë në apartamente ku do të qëndrojnë me qira deri kur të bëhet rindërtimi. Rindërtimi do të zgjasë. Të gjithë ata të cilën nuk kthehen në shtëpi se e kanë të dëmtuar deri kur tu riparohet shtëpia duhet të qëndrojnë si njerëz në apartamente,” tha Edi Rama duke folur edhe për vështirësitë e këtij procesi:

“Nuk është e lehtë se janë shumë. Nga ana financiare do ta përballojmë ne, jo me çdo çmim qiraje se nuk do të lejojmë abuzivizma, por me çdo çmim në kuptimin e kostos së përgjithshme. Objektivi është që pasi të kenë kaluar Krishtlindjet dhe Vitin e Ri në hotele si njerëz më vjen keq për të tjerët që mund të kenë menduar ose bërë ndonjë pronotim që të bëjnë Vitin e Ri apo Krishtlindjet në plazhin e Durrësit, është e pamundur.

Duke filluar nga fillimi i janarit të fillojë kalimi i tyre në apartamente që të kenë minimumin jetik dinjitoz, jo në apartamente që të shkojnë të shtrihen në tokë, por me pajisjet minimale të domosdoshme, me mundësi që të ushqehen edhe me një kuotë të caktuar si edhe ndihma ushqimore.”

Të premten flasin inxhinierët e ekspertët

Lidhur me godinat, Kryeministri Edi Rama tha se një ide më e qartë do të mund të krijohet vetëm pas mbledhjes së ekspertëve dhe inxhinierëve e cila do të zhvillohet të premten. 

“Në të gjitha kontaktet që unë kam pasur, edhe me disa nga grupet inxinierike, masat në skuadrat tona janë jashtë zakonisht pozitive. Grupit të tjera kanë ardhur dje, të tjera pritet të vijnë në vijim. Do t’u japim njerëzve garanci që godinat nuk përbëjnë rrezikshmëri dhe njëkohësisht duhet të vëmë në kryq të gjithë godinat që duhen shembur. Ditën e premte përfaqësuese të ekspertimit të godinave do të paraqesin për publikun raste dhe tipologji ndërtimesh për të treguar se nga dhe për çfarë duhet të ketë një shqetësim. Pastaj në çdo rast duhet të bëhet ekspertimi i veçantë. Të premten do të ndiqni nga goja e atyre që dinë se çfarë flasim,” tha Edi Rama ndërsa kishte  një apel për mediat:

“Dua t’u bëj apel mediave të adresojnë pyetjet për këto grupe, nuk iu kushton asgjë t’i kërkojnë ekspertët dhe t’i pyesin. Po punojmë për kuadrin e ri ligjor dhe penal për abuzimet në nderimit dhe njësia speciale ka nisur të gjithë hartën  për të identifikuar përgjegjësitë”.

Urgjent listën e ndërtuesve të pallateve të dëmtuara në Durrës

Sot Kryeministri Edi Rama në mbledhjen e jashtëzakonshme të Qeverisë bëri atë që din të bëjë më së miri, kërcënoi. Sot ai kërkoi të sigurohet brenda ditës lista me të gjithë ndërtuesit e pallateve të dëmtuara në zonën e Durrësit dhe të marrin përsipër riparimet e gjithë dëmeve të shkaktuara ndërsa ata që d itu shmangin këtij detyrimi të ndjeken penalisht.

“Sot brenda ditës duhet të merret në Bashkinë Durrës lista e ndërtuesve të të gjitha pallateve të dëmtuara, nëse nuk paraqiten vetë, të njoftohen të paraqiten dhe të marrin përsipër të bëjnë riparimet e gjithë dëmeve të shkaktuara. Por nën supervizimin e rreptë të grupeve të inspektimit,” tha Edi Rama ndërsa paralajmëroi ata që i shmangen këtij detyrimi:

“Do ta çojmë nën akuzë kushdo që shmanget, do kërkojmë në burg. Bëhet fjalë për dëmtime që nuk cenojnë qëndrueshmërinë e godinës, njerëzit të jenë të qartë për këtë. Ndërtimet e reja, të bëra nga mesi i viteve 90 e më pas në ‘99 kanë qëndruar më së miri, pjesa tjetër ajo shumë  e vogël është në 99 për qind të rasteve është abuzie, nga ata që kanë ndërtuar shto ujë e shto miell dhe në një përqindje të vogël nga kompani që kanë abuzuar me vetë lejen,” tha Edi Rama ndërsa për katet e shtuara mbi lejen do regjistrohen e më pas do të merret një nismë e veçantë.