Me 10 emigrantë drejt Malit të Zi, arrestohet 39-vjeçari në Shkodër

Një 39-vjeçar nga Durrësi është arrestuar në afërsi të Pikës kufitare Muriqan, pasi është kapur në flagrancë duke transportuar 10 emigrantë të paligjshëm.

“Strukturat e DVKM Shkodër, në bashkëpunim me Sektorin për Hetimin e Trafiqeve të Paligjshme dhe Narkotikëve në DVP Shkodër, pas një pune të mirorganizuar, bazuar edhe në informacionet e marra në rrugë operative, kanë organizuar dhe finalizuar operacionin policor të koduar “Muriqani”, si rezultat i të cilit u arrestua në flagrancë shtetasi: I. S. 39 vjeç, banues në fshatin “Sektor Rinia”, Durrës, për veprën penale “Ndihma për kalim të paligjshëm të kufijve,” thuhet në komunikatën e policisë duke saktësuar se arrestimi u kry në aksin rrugor Shkodër-Muriqan, në afërsi të vendkalimit Muriqan ndërsa po drejtonte një automjet tip “Toyota”, me të cilin dyshohet se ka transportuar kundrejt fitimit, 10 emigrantë pakistanezë, të cilët kishin si destinacion fillestar Malin e Zi për të vazhduar drejt vendeve të BE-së.

Për veprime të mëtejshme, thekson policia, materialet i janë kaluar Prokurorisë pranë Gjykatës së Rrethit Gjyqësor Shkodër.