Më 7 korrik hapet sezoni i protestave, Berisha: Domosdoshmëri, për të rrëzuar regjimin monist të Edi Ramës!

Protestat janë një domosdoshmëri për të rrëzuar regjimin monist të Edi Ramës, tha Kryetari i Partisë Demokratike, Sali Berisha, në një takimi me anëtaret e Forumit të Gruas ndërsa tregoi edhe arsyen përse zgjodhi datën 7 korrik, për të cilën është i bindur se do jetë protesta më e madhe që është organizuar ndonjëherë.

Duke vlerësuar rolin e grave në rithemelimin e PD, Kryetari i Partisë Demokratike i inkurajoi gratë dhe vajzat që të bëhen pjesë e primareve për kandidatët e zgjedhjeve vendore që zhvillohen vitin e ardhshëm

“Shpallëm datën 7 korrik si protestë kombëtare. E shpallëm këtë datë sepse konstatonim se pakënaqësia është shumë e madhe ndaj kësaj qeverie dhe në rast se do ta shtynim protestën për një kohë optimale, në fakt do thellohej dëshpërimi tek njerëzit.

Nuk e kemi të fshehur, por të hapur. Qëndrimi ynë, platforma jonë krahas parlamentit dhe formave të tjera do jetë protesta, protesta dhe vetëm protesta.

Protestën e datës 7 korrik e kemi preludin dhe do bëjmë gjithçka për një protestë më të madhen që mund të kemi organizuar. E kemi preludin e sezonit të protestave kundër regjimit monist të Edi Ramës,” tha Sali Berisha duke shtuar se PD duhet të arrijë sa më shpejt që rolin dhe vendin tuaj ta ketë në atë nivel, në atë pozicion që duhet.

“Një përparim është bërë në këtë proces, por këto janë vetëm hapat e parë. Jemi jo në objektivin që kemi, objektivi është natyral që kemi përcaktuar, barazia e plotë midis burrave dhe grave në këtë forcë. Kjo është jo vetëm në rrafshin moral një objektiv jetik për emancipim shoqëror, për zhvillimin dhe shpalosjen e të gjitha potencialeve tona, por kjo bëhet sot shumë më e rëndësishme sepse kemi të bëjmë me politika zyrtare të kriminalizimit të kësaj shoqërie.

Në disa takime që unë kam patur, shpreh keqardhjen se në rast se iu hedh një vështrim auditorëve tona, ato janë mashkullore në mënyrë krejtësisht të pamerituar. Dhe që këtu ne shprehim si PD angazhimin e madh. Por nga ana tjetër fitorja kalon vetëm nëpërmjet jush, ua them këtë me bindjen më të thellë. Fitorja kalon nëpërmjet zonës elektorale grua, vajzë. Kjo zonë elektorale është më e fuqishme në rrafshin elektoral se sa zona tjetër. Kjo zonë elektorale është më numerike, por është gjithashtu edhe shumë më aktive në fushatat zgjedhore. Ndaj pa asnjë diskutim, fitorja e PD e cila është jetike sot për fatet e shoqërisë shqiptare, kalon nga vajzat dhe gratë demokrate të Shqipërisë.”

Ne jemi tani në prag të fushatës për zgjedhjet vendore, tha Kryetari i PD, Sali Berisha, Berisha, duke inkurajuar gratë të kandidojnë:

“Më vjen mirë shumë se të parin, ose njeriu i parë që është paraqitur tek unë për të më shprehur dëshirën e vet për të kandiduar për bashkinë e qytetit të saj, ishte një zonjë. Pasi biseduam për problemet të cilat kishte më thotë se unë e kam ndërmend. I them, një fjalë standarde, që e kemi me primare. Pikërisht, më tha, nëse më përpara për një detyrë i thashë vetëm vëllait tim, do të loboj dhe do të fitoj. Ju ftoj të bëheni pjesë e garës së primareve dhe pastaj të garës për drejtues të bashkive dhe këshilltarë. Kam shumë dëshirë të shoh një numër sa më të madh vajzash dhe grash në detyra, të cilat janë absolutisht të përgjegjshme në detyrat e tyre”.