Me Ambasadorët e Quintit, Presidentja e Kosovës: Të kërkohet llogaridhënie nga Serbia!

Pas sulmit terrorist serb dhe aktit të agresionit të Serbisë kundër Kosovës, Presidentja Vjosa Osmani zhvilloi një takim me Ambasadorët e Quintit dhe BE-së për të diskutuar situatën aktuale në veri të vendit.

Ndërsa ka falënderuar ambasadorët për solidaritetin dhe ngushëllimet e shprehura për vrasjen e heroit të Kosovës, rreshterit të Policisë së Kosovës, Afrim Bunjakut, si dhe lëndimit të disa policëve tjerë, Presidentja Osmani vlerësoi lartë punën e shkëlqyeshme dhe profesionale të Policisë së Kosovës si dhe institucioneve të tjera të sigurisë në ballafaqimin me sulmin terrorist. 

“Kosova është e vendosur që të vazhdojë ta promovojë paqen dhe stabilitetin në rajon, si dhe të punojë me komunitetin lokal serb për t’i afruar dhe integruar në shoqërinë dhe institucionet e Kosovës,” tha Presidentja Osmani duke theksuar rëndësinë e bashkëpunimit të ngushtë me shtetet aleate dhe koordinimit të institucioneve të sigurisë, me qëllim të parandalimit të përsëritjes së akteve të tilla.  

Presidentja ka bërë të ditur se institucionet e Republikës së Kosovës janë të përkushtuara në menaxhimin e situatës aktuale dhe për të ndihmuar në arritjen e ruajtjen e paqes dhe stabilitetit. 

Presidentja e Kosovë vlerësoj me këtë rast se duhet të kërkohet llogaridhënie nga Serbia për veprimet e saj kundër Kosovës, duke ia bërë të qartë se duhet të ndalojë financimin, mbështetjen dhe shtytjen e grupeve kriminale për veprime terroriste ndërsa përfundoi: 

“Mungesa e masave të tilla mund të keqpërdoret nga ana e Serbisë dhe për rrjedhojë mund të kemi përsëritje të veprimeve terroriste!”