Me Edi Ramën nuk ka zgjedhje, Berisha: Me protesta të fuqishme do mbrojmë pluralizmin!

Të gjitha të vërtetat tona janë çertifikuar plotësisht nga Raporti i OSBE/ODIHR, tha Kryetari i Partisë Demokratike, Sali Berisha, sot në konferencën e përjavshme duke konstatuar se me Edi Ramën nuk ka zgjedhje dhe do jetë PD që me protesta të fuqishme do mbrojë pluralizmin.

“Së pari, ne me qytetarët po flasim me të vërteta dhe fakte, të cilat me kënaqësi konstatoj se janë certifikuar plotësisht nga institucioni i pavarur i zgjedhur nga komuniteti ndërkombëtar për të vëzhguar zgjedhjet në të gjithë hapësirën euroatlantike, në të gjithë hapësirën e OSBE-së.

Ne vlerësojmë se, çështjet themelore që paraqiten në këtë libër, në respektin më të madh të mbrojtjes së votës së qytetarëve dhe dënimit të kriminelëve elektoralë, janë pasqyruar në raportin e OSBE/ODIHR.
Asgjë nuk bind më shumë se e vërteta njeriun.

Sa i përket çështjes së dytë, pa diskutim PD është në një analizë, do të vazhdojë analizën dhe do i përmbahet me përpikmëri statutit të saj,” tha Sali Berisha duke siguruar se Partia Demokratike është në përputhje me atë që kemi deklaruar për mbrojtjen e votës.

“Ne jemi zotuar përpara shqiptarëve se do mbrojmë votën.

Mbrojtja e votës është një proces. Ne kemi pasur parasysh qëndrimin tonë, që votën nuk e mbrojmë me armë, por ky raport ndërkombëtar, i cili pasqyron një për një çështjet më themelore të këtij libri të zi, kushtuar farsës elektorale të 14 majit, në 690 faqe të tij, dhe ju garantoj se do ketë një vëllim tjetër, për disa gjëra që do ua bëjmë të ditur më vonë, por janë të gjithë për mbrojtjen e votës.

Procesi i mbrojtjes së votës nënkupton vërtetimin e dhunimit të saj.

Procesi i mbrojtjes së votës nënkupton gjetjen e rrugëve për garantimin e votës së lirë.

Pra, në këtë kontekst, ne jemi në përputhje me atë që kemi deklaruar.

Duart e tyre janë prerë, janë në këtë raport. Duart e zeza janë në këtë raport dhe vazhdon beteja,” tha kreu demokrat i bindur tashmë se me Ramën nuk ka zgjedhje, thelbi janë protestat e fuqishme.

“Ky raport ka një mesazh për shqiptarët: me Edi Ramën nuk ka zgjedhje, por ka farsë.

Akti i djeshëm në parlament përbënte atentatin më të shëmtuar të narkoshtetit ndaj pluralizmit parlamentar në 32 vite.

Edi Rama tregoi se nuk pranon pluralitetin e vërtetë në parlament dhe në një akt të pashembullt, në mënyrë absolute në asnjë vend tjetër pluralist, merr përsipër t’i caktojë opozitës, përfaqësuesin që don ai.
Siç bëri në zgjedhjet e 14 majit me kryetarin e koalicionit.

Të gjitha këto janë çështje thelbësore të cilave opozita duhet t’u përgjigjet dhe do u përgjigjet.

Thelbi është me protesta të fuqishme dhe përpjekje të tjera komplekse.

Me Edi Ramën nuk ka zgjedhje, nuk ka pluralizëm parlamentar. Ne do i mbrojmë ato,” tha Berisha duke konstatuar se e vetmja betejë që u bë në vitin 2021 ishte kundër Sali Berishës dhe për të qeverisur së bashku Rama me pengun e tij, Lul Basha.

“Në vitin 2021 nuk u bë asnjë betejë për atë që u shpall masakra elektorale.

E vetmja betejë që u bë, u bë projekti për të qeverisur së bashku.

E vërteta në mënyrë absolute.

E vetmja betejë, ishte, meqenëse e doni, kundër Sali Berishës dhe për të qeverisur së bashku Rama me pengun e tij, Lul Basha.

Jo, nuk u bë betejë, jam dëshmitar i kësaj.

Ne bëmë këtë si një detyrim ndaj të gjithë zgjedhësve se do ishte hipokrizi dhe e pafalshme që të mbulosh humbjen elektorale me të pavërteta dhe deklarata politike.

Do të ishte një tradhti ndaj votës së lirë dhe pluralizmit.

Ne qëndruam dhe kemi argumentuar sot se vota e shqiptarëve, sipas këtij raporti, u kontrollua në të katër anët e vendit.

Vota e kontrolluar është votë e vdekur.

Vota e kontrolluar nuk është votë e lirë.

Detyra më e rëndësishme, misioni më i madh i opozitës është të garantojë 2025-ën.

Votë të lirë për shqiptarët dhe me Edi Ramën nuk ka votë të lirë.

600 mijë qytetarë shqiptarë, me të gjithë këto faktorë që numërohen në këtë raport, nuk u mposhtën, nuk iu nënshtruan diktatit të qeverisë, por votuan kundër saj.

Opozita do punojë fort me këta 600 mijë idealistë që të luftojmë dhe sakrifikojmë për rikthimin e votës së lirë në Shqipëri,” tha lideri i opozitës duke sjellë në vëmendje se SPAK-u e kishte dosjen e farsës elektorale, por nuk bëri asgjë ndaj organizatës kriminale në pushtet.

“Çdo dokument i këtij libri u është dërguar të dy misioneve vëzhguese, misionit të OSBE/ODIHR dhe misionit të Këshillit të Europës.

Pra, ka qenë një komunikim konstant me ta.

Ky raport dhe libri i zi faktojnë se kabineti qeveritar është një organizatë kriminale, jo vetëm për vjedhjet e parave, jo vetëm për lidhjet me bandat, por edhe për krimin e organizuar elektoral.

Është një organizatë kriminale, e përjashtuar nga ligji, sepse SKAP-i i partisë, kishte dosjen me të gjithë dokumentet dhe nuk bëri asnjë veprim ndaj Edi Ramës, Damian Gjiknurit, Ulsi Manjës, Taulant Ballës, etj.

Kjo e bën edhe më dramatike situatën,” tha Kryetari i Partisë Demokratike duke e bërë të qartë se Partia Demokratike nuk bojkoton sepse bojkoti do të thotë rikthimi i monizmit në qeverinë vendore.

“Pse ne nuk bojkotojmë?

Bojkoti do të thotë rikthimi i monizmit në qeverinë vendore.

Ne nuk e rikthejmë monizmin, përkundrazi do përpiqemi që këshilltarët tanë të kthehen në një zë të fuqishëm për qytetarët aty ku janë.

Votëbesimi i kryetarit të PD, sipas statutit, më thonë se e paska Kuvendi. Do bëhet siç thotë statuti.

Unë jam i gatshëm edhe me anëtarësinë, nëse thotë Kuvendi, por natyrisht do respektohet statuti.”

Në fund, Kryetari i Partisë Demokratike, Sali Berisha e bëri të qartë se PD nuk do ta njoh kurrë një Kryetar që e cakton Edi Rama.

“Por përgjegjësia do bjerë mbi ata që e çojnë vendin drejt destabilizimit

Ne nuk do të njohim një akt që përjashton opozitën.

Ne nuk mund të njohim kurrë një Kryetar që e cakton Edi Rama.

Por përgjegjësia do bjerë mbi ata që e çojnë vendin drejt destabilizimit.

Nuk ka shqiptar, në 600 mijë shqiptarë që kanë votuar kundër qeverisë, nuk janë as 10 që mund të pranojnë se përfaqësuesin e tyre ta caktojë Edi Rama.

Nuk ka ndodhur kurrë.

Ai e bën këtë, por ne do bëjmë gjithçka të përballet me pasojat që krijon me një akt të tillë.”