Më i rëndi në historinë 32-vjeçare, Berisha: Edi Rama po përgatit atentatin ndaj pluralizmit!
Edi Rama po përgatit atentatin më të rëndë në historinë 32-vjeçare ndaj pluralizmit, kërkon ti emërojë opozitës përfaqësuesin e saj, tha Kryetari i Partisë Demokratike, Sali Berisha pas mbledhjes së përbashkët të deputetëve të opozitës ndërsa shtoi se opozita ka propozime të shumta për reformën zgjedhore.
Lidhur me Rezolutën e paraqitur me mocion për Kosovën, Kryetari i Partisë Demokratike tha se me urdhër të Edi Ramës ajo është hequr nga rendi i ditës së parlamentit.
“Rezoluta e paraqitur me mocion për Kosovën, të cilën me urdhër të Edi Ramës e kanë hequr nga rendi i ditës, sepse i diskredituar kombëtarisht dhe ndërkombëtarisht, ai nuk ka pranon të ketë një diskutim të hapur për situatën jashtëzakonisht shqetësuese në Kosovë, të krijuar nga Beogradi dhe padyshim Rusia.”
Nga ana tjetër, tha lideri i opozitës, ka të dhëna se Edi Rama po përgatit atentatin më të rëndë në historinë 32-vjeçare të pluralizmit politik shqiptar, po përgatitet të marrë përsipër përdorimin e votave për ti emëruar opozitës përfaqësuesin e saj.
“Opozita është e vendosur të qëndrojë në të drejtën e saj si opozitë dhe në mbrojtje të opozitarizmit.
Opozita është e vendosur të qëndrojë në mbrojtje të votës, të të gjithë atyre që votuan kundër kësaj qeverie dhe për opozitën.
Në mbledhje u diskutuan dhe çështje të tjera të rendit të ditës. Ranë në ujdi për të gjitha qëndrimet dhe mund të ju them se ishte një mbledhje shumë e frytshme,” tha Berisha duke e bërë të qartë se opozita ka propozime të shumta për reformën zgjedhore, por Edi Rama nuk njeh asnjë normë, asnjë ligj.
Pyetje: A keni një ide apo draft për reformën zgjedhore?
Sali Berisha: Ne kemi, kemi propozime të shumta. Ne kemi tani në dorë raportin e fundit të OSBE-ODIHR, i cili kësaj here si kurrë ndonjëherë më parë, si pikë të parë ka ndëshkimin e dhunimit masiv të zgjedhjeve, por ka dhe rekomandimet. Kemi specialistët më të mirë në këtë fushë, natyrisht kjo nuk i pëlqen Edi Ramës.
Pyetje: Kur thoni se Edi Rama po bën përpjekje për të përcaktuar përfaqësuesin e opozitës, e keni fjalën për të zëvendësuar kryetarin e grupit parlamentar Gazment Bardhi me të deleguarën e Lulzim Bashës. Dhe nëse po çfarë diskutuar për të kundërshtuar.
Sali Berisha: Edi Rama nuk njeh ligj, nuk njeh kod moral, nuk njeh kushtetutë, nuk njeh asnjë normë. Në këtë aspekt ju garantoj se është i aftë të propozojë çdo vendim dhe të urdhërojë çdo vendim.
Pyetje: Cili është interesi i Ramës në këtë rast?
Sali Berisha: Interesi i Ramës është pushteti absolut. Kaq është.
Pyetje: Z. Berisha, ju thoni se kryeministri nuk njeh asnjë normë, asnjë ligj. Përse duhet të vijojë opozita të qëndrojë në parlament?
Sali Berisha: Unë nuk jam që të bojkotohet parlamenti, duhet të vazhdojë betejën e gjithanshme.
Pyetje: Media në Kosovë thonë që është arrestuar Milan Radoiçiç? Keni koment për këtë?
Sali Berisha: Radoiçiç ka qenë në Serbi dhe ka shumë mundësi që presion i madh ndërkombëtar të ketë detyruar Aleksandër Vuçiç të arrestojë terroristin që ai dërgoi në Banjksë me të gjitha mjetet e ushtrisë për të filluar atë që vetë Vuçiç e quajti, rebelim kundër terrorit imagjinar të Albin Kurtit ndaj komunitetit serb. Ky arrestim është një hap, por ai duhet të sillet të gjykohet në Kosovë, aty ku ka kryer aktin terrorist.
