Serbia do ti ul perdet e dramës RADOIÇIÇ me “trafik armësh nga Bosnja”
Arrestimi i terroristit Milan Radoiçiç u mundua të shitet si një akti i madh ligjor i Beogradit për të kontribuar në qetësimin e situatës, por verpimet e Prokurorisë së Lartë Publike në kryeqytetin serb nuk arritën të ulin perdet e kësaj drame të shëmtuar serbe, që në gjithë këtë rrëmujë implikoi dhe autoritetet boshnjake që “ndihmuan” terroristin Radoiçiç.
Ndonëse u tha se Milan Radoiçiç pranoi ditë më parë përgjegjësinë për organizimin e sulmit terrorist në Banjskë, sot Prokuroria serbe pasi i caktoi masës e ndalimit prej 48 orësh deklaroi se Radoiçiç u intervistua si i dyshuar bashkë me disa persona, çuditërisht të panjohur, që kanë kryer vepra penale të bashkimit, me qëllim të kryerjes së veprave penale: “prodhim, mbajtje dhe trafikim i armëve të zjarrit dhe lëndëve shpërthyese”, si dhe “vepra të rënda kundër sigurisë së përgjithshme”.
Dhe, për të dëshmuar se pse quhet serbe, Prokuroria e Beogradit deklaron se Radoiçiç dyshohet se ka siguruar armë, municione dhe mjete shpërthyese me fuqi të madhe shkatërruese nga Tuzlla! Pra, jo në Republikën Srpska ku nga fisheku deri në helikopter blenë e gjithë dynjaja terroriste, por terroristi Milan Radoiçiç paska qenë i kujdesshën të kaloi Republikën e Dodikut dhe të furnizohet në Federatën e Bosnje Hercegovinës, nga janari deri më 24 shtator të vitit 2023.
Skenari i kësaj drame terroriste vazhdon me sqarimin se armët i janë dorëzuar Milan Radoiçiçit në paralagjet e Beogradit, Bubanj Potok dhe Vërçin, më pas ato armë ai i ka transportuar dhe ruajtur në vende të pacaktuara në territorin e Kosovës, ku i ka fshehur në objekte të braktisura dhe pyje, thekson Prokuroria serbe duke cituar deklaratën e terroristit Radoiçiç.
Ndonëse Presidenti i Serbisë, Aleksandar Vuçiç mendon se gjithçka do të mbyllet me trafik armësh dhe vepra kundër sigurisë, ai mendon se mund të uli perdet e kësaj drame duke mos përfillur qëndrimin e Bashkimit Europian se autoritetet e Kosovës kanë mandat për hetimin e sulmit në Banjskë dhe se Serbia e ka obligim të bashkëpunojë, pa kushte, si dhe faktin se përpjekja për implikimin e Bosnje Hercegovinës në këtë akt terrorist ka kosto, sepse pavarësisht akteve të kriminelit Milorad Dodik, aty ka shtet!
Dhe, ky shtet reagoi menjëherë! Policia e Bosnje Hercegovinës paralajmëroi se do të nisë verifikimin e pretendimeve se Radoiçiç ka siguruar armë, municione dhe mjete shpërthyese nga Tuzlla ndërsa Prokuroria është shprehur se nuk ka ndonjë informacion për armët që trafikohen në këtë qytet.
Ndërkohë ministri i Brendshëm i Federatës së Bosnje Hercegovinës, Ramo Isak, shkoi dhe më larg dhe përveç se deklaroi se nuk ka informacion për ndonjë armë në zonën e Tuzllës, shtoi se do të kërkojë më shumë detaje nga “i arrestuari” Milan Radoiçiç.
Në fund, pavarësisht se Ministria e Brendshme e Serbisë njoftoi se ka kontrolluar banesën dhe ambientet e tjera të Milan Radoiçiçit, u dërgua në Prokurorinë e Lartë Publike në Beograd ku iu konfirmua kallëzimi penal dhe masa e ndalimit për 48 orë, në rastin më të mirë, Aleksandar Vuçiç mund të ul perdet e kësaj drame me një hetim ndërkombëtarë duke mos ekstraduar Radoiçiçin në Prishtinë.
Nëse Aleksandar Vuçiç nuk e pranon hetimin ndërkombëtar dhe ekstradimin e Milan Radoiçiçit në Prishtinë, atij i ngelet leva e perdeve për ta lëvizur siç ia do zemra, por, hiri që i hodhi syve Lajçakut dhe Escobarit do ti kthehet surratit të Presidentit të Serbisë, dhe përrallat e këtij terroristi të sofistikuar, në të ardhmen mund të vazhdoj ti besoj vetëm Edi Rama!
Për ata që e kanë merakun se sa mund të dënohet terroristi Milan Radoiçiç për veprën penale me të cilë n akuzohet, “prodhimi, mbajtja dhe trafikimi i paligjshëm i armëve dhe lëndëve shpërthyese”, ligji kriminal serb thotë DERI në 12 vjet burg.
Meqë siguria e përgjithshme nuk ka të bëjë me veprën penale që ka ndodhur në Serbi, ajo është një broçkullë që e ka futur Prokuroria serbe për ti thënë Ambasadorit amerikan në Beograf, Hill, se ata e luftojnë krimin, ndërsa harroi gjithë ata policë e doganierë serbë që lejuan lëvizjen e armatimit me vlerë 5 milionë euro nga kufiri me Bosnje Hercegovinën deri në Banjskë edhe nëpër këmbët e KFOR-it!
Në fund, sot, krimineli Aleksandar Vuçiç mund ti ul perdert e dramës “Radoiçiç”, por në shtetin serb që vazhdon ta përndjekë gjaku që nga vrasja e fëmijëve serbë në qytetin e Pejës nga dora e zezë e UDB-së, pas pamjeve që u transmetuan nga Ministria e Brendshme e Kosovës, për fat të keq ka mjaft terroristë në Serbi që e besojnë, por, ashtu siç i erdhi dita e zbardhjes rastit të Pejës “Panda”, tashmë shumë më shpejtë do ti vijë dita e zbardhjes edhe rastit “Radoiçiç” në Banjskë, deshti apo nuk deshti Beogradi zyrtar ta ekstradojë Milan Radoiçiçin në Prishtinë!
