Media e Putinit “Readovka” publikoi numrin e ushtarëve të vrarë rus dhe e fshiu

Media ruse proregjimit të Vladimir Putin “Readovka” sot në rrjetin social VK publikoi lajmin mbi numrin e ushtarëve të vrarë rus gjatë pushtimit të Ukrainës dhe më pas e fshiu.

Interesante është se “Readovka” i referohet një informacioni i cili është thënë në një takim me mediat me dyerë të mbyllura me ministrinë ruse të Mbrojtjes.

Në publikimin e lajmit që tashmë është fshirë theksohet se ministria e Mbrojtjes në këtë takim me dyerë të mbyllura ka bërë të ditur se në Ukrainë janë vrarë 13.414 ushtarë rus dhe 7.000 evidentohen si të zhdukur. 

Gjithashtu, “Readovka” raporton se në luftanijen ruse “Moskva” janë vrarë 116 pjesëtarë të forcave detare ruse dhe më shumë se 100 vazhdojnë të evidentohen si të zhdukur.