Memorandumi Overgas-Albgaz, Rama: Me Sekretarin e Shtetit, një tjetër hap të rëndësishëm 

Pas propagandës së pështirë të asqerëve të Lulzim Bashës mbi arsyet e prezencës së Ish-Sekretarit të Shtetit në Tiranë, sot Mike Pompeo me Kryeministrin Rama morën pjesë në nënshkrimin e Memorandumit të Mirëkuptimit mes Overgas dhe Albgaz, ndërsa Edi Rama foli për një furnizimi me gaz përmes Terminalit të Ri, që do të ngrihet në Vlorë:

“Me Sekretarin e Shtetit, Mike Pompeo, në një tjetër hap të rëndësishëm drejt përmbushjes së vizionit Shqipëria 2030 eksportuese neto e energjisë. Furnizimi me gaz përmes Terminalit të Ri, që do të ngrihet në Vlorë, tanimë po zgjon interesa të shumanshme.”

Para firmosjes së këtij Memorandumi, ministrja e Infrastrukturës dhe Energjetikës, Belndia Balluku tha se ky projekt ka tërhequr Maqedoninë e Veriut dhe Kosovën për t’u bërë pjesë.

“Është një moment i shënuar për një nga projektet tona më të rëndësishme dhe strategjike që ka të bëjë me gazifikimin e Shqipërisë, duke iu referuar projektit të Termocentralit të Vlorës të pjesës gazifikuese të portit lundrues që do të ndërtohet në Vlorë dhe padyshim të një hapi të madh që ne po hedhim duke e kthyer këtë projekt nga një projekt lokal në një projekt rajonal,”  tha Belinda Balluku.

Ndryshe, sot Ish-Sekretari i Shtetit, Mike Pompeo, do të marrë pjesë në një Konferencë me rastin e 100 vjetorit të vendosjes së marrëdhënieve diplomatike mes Shqipërisë dhe SHBA-së organizuar nga Parlamenit i Shqipërisë ndërkohë do të marrë dhe titullin Honoris Causa nga Universiteti i Tiranës.