Merkel paralajmëron armatim të ri për BE

Vendet e BE mund të zhvillojnë sisteme të reja armatimi në të ardhmen, përfshirë avionë luftarakë dhe tanke. Kështu deklaroi sot kancelarja gjermane Angela Merkel në një videomesazh drejtuar kombit, raporton “Welt”.

“Gjermania dhe Franca kryesojë në këtë drejtim,” tha Merkel, duke shtuar  se ushtria gjermane kishte nevojë për burime të përshtatshme financiare për t’iu përgjigjur sfidave aktuale.

Kancelarja gjermane theksoi rëndësinë e NATO-s në mbrojtje, duke shtuar se po bëhej gjithnjë e më e qartë se anëtarët e Aleancës evropiane do të duhej të merrnin përgjegjësi më të mëdha në të ardhmen.

Ndërkohë Ministri i Jashtëm i Gjermanisë, Heiko Maas sërish ka ritheksuar qëndrimin kundër të shtetit të tij ndaj kritikave që ka bërë Franca për NATO-n, duke paralajmëruar se as Gjermania e as Evropa, nuk do të jenë në gjendje që ta mbrojnë vetën në mënyrë efektive, pa ndihmën e Shteteve të Bashkuara.

Këto komente vijnë në kohën kur Washingtoni po bën presion që shtetet anëtare të NATO-s të paguajnë më shumë për mbrojtje.

Presidenti i Francës, Emmanuel Macron gjatë kësaj jave deklaroi për The Economist se “truri i NATO-s ka vdekur”, duke sugjeruar që Evropa duhet të marrë në duart e saj çështjen e sigurisë dhe nuk duhet të varet nga Shtetet e Bashkuara për të mbrojtur aleatët e saj.

“Do të ishte gabim nëse e minojmë NATO-n”, tha Maas për Der Spiegel duke e pranuar se evropianët duhet të ndërtojnë kapacitetet e tyre mbrojtëse:

“Prandaj, së bashku me Francën, ne po punojmë për të ndërtuar një Evropë që punon së bashku për politikat e sigurisë!”