Merr detyrën Drejtori i ri. Gledis Nano: “Betohem të mbaj me nder flamurin e Policisë së Shtetit!”

Një polici më e trajnuar, intensifikimi i bashkëpunimit me të gjitha agjencitë ligjzbatuese dhe partnerët, tha Drejtori i ri i Policisë së Shtetit, Gledis Nano, janë prioirtet e tij sot kur mori detyrën nga Ministri i Brendshëm Bledi Çuçi në një ceremoni zyrtare duke bërë dhe betimin se do ta mbajë me nder flamurin e Policisë së Shtetit.

Me këtë rast, Nano e pranoi se ky profesion nuk ishte një zgjedhje karriere, por pasion i frymëzuar nga babai i tij, ish-oficer policie.

“I nderuar kryeministër, në këtë çast solemn në shenjë nderimi detyrimi dhe respekti për gjakun e punonjësve të policisë, ne emër të të gjithë punonjësve të Policisë së Shtetit, në nderin tim personal, betohem për të mbajtur me nder flamurin e Policisë së Shtetit! Betohem!

Besimi i kësaj detyre përveç privilegjit më ngarkon me përgjegjësi për të qenë ne lartësinë e detyrës. Profesioni im nuk ishte një zgjedhje karriere, por pasion i frymëzuar nga babai im, ish-oficer policie. Në këto dekada kam kuptuar se ky institucion është një pjesë kryesore e jetës sime që kërkon angazhim të lartë. Sfidat për policinë janë të shumëfishta. Qytetarët presin nga Policia e Shtetit standarde të tjera reagimi dhe sjelljeje në zgjidhjen e shqetësimeve të tyre dhe ne do bëjmë ç’ështe e mundur për t’i arritur. Kërkoj prej tyre ta konsiderojnë organizatën tonë si një partner. Roli i tyre është i pazëvendësueshëm në punë tonë,” tha Drejtori i ri i Policisë së Shtetit, Gledis Nano, duke përfunduar:

“Prioriteti im, intensifikimi i bashkëpunimit me të gjitha agjencitë ligjzbatuese dhe partnerët. Një polici më e trajnuar.
Dua t’i uroj çdo kolegu suksese në përmbushjen e detyrës. Kërkoj angazhimin tuaj maksimal në realizimin e detyrave sipas betimit që kemi bërë.”