Mesazh Ramës, BE: 25 Prilli, provë e funksionimit të demokracisë shqiptare!

Sfidat për Shqipërinë janë të panumërta, si për shkak të pandemisë ashtu dhe tërmetit, theksojnë zyrtarët e lartë të BE pas takimit me Kryeministrin Edi Rama ndërsa konstatojnë sot se Shqipëria po jep rezultate e po mban premtimet që ka bërë dhe po përmush kushtet për konferencën e parë ndërqeveritare. Madje konstatojnë përparim edhe në luftën kundër korrupsionit por për çështjen e blerjes së votës dhe zgjedhjet e 25 prillit, si Përfaqësuesi i Lartë për Politikë të Jashtme dhe Siguri ashtu dhe Komisioni për Zgjerimin ishin më të qartë si për taksapaguesit evropianë ashtu dhe shqiptarët që nuk i kanë prekur ende asnjërën nga sukseset që u renditën, as në menaxhimin e pandemisë dhe rindërtimin e dëmeve nga tërmeti, dhe as luftën kundër korrupsionit, të cilat Ambasadori Soreca, siç duket, i ka raportuar!

Sidoqoftë, Përfaqësuesi i Lartë për Politikë të Jashtme dhe Siguri, Josep Borrell tha se ka inkurajuar kryeministrin Rama që të ndjekë të gjitha rekomandimet e OSBE-ODIHR dhe Komisionit të Venecias ndërsa Komisioneri Europian për Zgjerimin, Oliver Varhelyi, tha se zgjedhjet e 25 prillit do të jenë provë e funksionimit të demokracisë shqiptare.

“Sa iu takon zgjedhjeve kuptojmë që përgatitjet praktike për zgjedhjet e ardhshme janë në proces e sipër. E kemi inkurajuar kryeministrin që të ndjekë të gjitha aspektet që mbulojnë rekomandimet e OSBE-ODIHR dhe Komisioni i Venecias. Sa i përket çështjes specifike të blerjes së votës më lini t’ju them që raporti i fundit i KE për Shqipërinë theksoi një hetim transparent të akuzave për shkelje të dyshuara zgjedhore. Po kështu vendimi i Këshillit në mars të 2020, thekson se nisja e proceseve gjyqësore kundër atyre që akuzohen për blerjen e votës është një nga çështjet që duhen reflektuar në kuadrin reflektues,” tha Borrell duke shtuar:

“Ky është qëndrimi zyrtar i Këshillit dhe Komisionit!”

Ndërsa Varhelyi tha se ka garanci të mjaftueshme në sistem duke përmendur që nga marrëveshja e 5 qershorit, tek rekomandimet e ODIHR dhe më pas pjesëmarrjen e vëzhguesve në zgjedhje.

“Ajo çfarë mund t’ju them është se ne po i afrohemi zgjedhjeve që janë përgatitur në një mënyrë mjaft tërësore. Së pari kemi pasur një marrëveshje midis partive parlamentare dhe jashtë parlamentare për reformën zgjedhore. Ky është një element i ri krahasuar me zgjedhjet e mëparshme. Kjo sjell garanci për parregullsi në procesin e votimit. Është trajtuar si një çështje madhore tek rekomandimet e ODIHR. Më pas kjo u vijua nga opinioni i Komisionit të Venecias për të cilat qeveria dhe partitë ranë dakord. E treta është pjesëmarrja e vëzhguesve në zgjedhjeve. Janë ftuar vëzhguesit por nga ana jonë ne do të ndihmojmë që vëzhguesit të vijnë, të jenë të pranishëm. Garanci të mjaftueshme ofrohen në sistem.

Për blerjen e votës do të shohim nëse do të ketë veprime në terren. Ne duam që ligji të zbatohet me fuqi të plotë. Duam të shohim që të gjitha përpjekjet të bëhen nga ana e organizatorëve të zgjedhjeve kundër blerjes së votës,” tha Komisioneri Europian për Zgjerimin ndërsa për zgjedhjet e 25 prillit u shpreh qartëse se ato do të jenë një provë për të parë funksionimin e demokracisë shqiptare.

“E dimë që së shpejti do ketë zgjedhje parlamentare. Shprehëm shpresën se do jenë të lira e tëndershme, do kemi provën e parë të funksionimit të demokracisë shqiptare. Inkurajuam Shqipërinë të mos ndalojnë së punuari edhe gjatë fushatës, sepse rezultatet janë të rëndësishme për të bindur shtetet anëtare për të celur negociatat.”

Dhe derisa zyrtarët e BE kërkuan që Shqipëria të zbatojë rekomandimet e ODIHR për zgjedhjet e 25 prillit, duke vënë theksin tek akuzat e shumta për blerje votash në vendin tonë, kryeministri Edi Rama tha se janë 20 persona nën hetim për këtë akuzë.

 “Ka 20 persona të ndjekur nga prokuroria, për blerje votash, që tani që flasim janë në proces e sipër. Janë 20 persona të dyshuar nga të gjitha partitë të dyshuar për blerje votash”.

Për dallim nga bisedat gju më gju me komunistët nëpër tokën shqiptare ku kërcënon Bashkimin Evropian, sot në Bruksel, Edi Rama tha se Shqipëria mbetet besnike unike e BE-së dhe se Shqipëria do të ishte e fundit që do zhgënjehej nga projekti europian.

“Ne marrim pjesë që gjithçka do që të marrim pjesë, nuk e vëmë në diskutim këtë gjë. Vendi ynë besnik unik ndaj BE-së. S’kemi devijuar nga politika e sigurisë e unionit. Kemi qenë besnikë ndaj çdo perandorie dhe të fundit që do të zhgënjenim perandorinë tonë,” tha Kryeministri Edi Rama ndërsa Komisioneri për Zgjerimin konstatoi:

“Sot diskutuam për Shqipërinë dhe gjetja jonë është se Shqipëria i ka përmbushur kushtet. Duhet të organizohet mbledhja ndërqeveritare. Me Maqedoninë e Veriut kërkojmë datë, por në kohë Covidi, ndoshta ka disi vonesë.”