Meta i përgjigjet Veliajt për Teatrin: Lexo faqen e Presidencës për të kuptuar…

Presidenti Ilir Meta ka zgjedhur Pustecin për t´iu përgjigjur Kryebashkiakut Erjon Veliaj lidhur me dekretin për kthimin e ligjit për Teatrin për rishqyrtim në Kuvend.

Meta është pyetur nga mediat lidhur me deklarimet e Veliajt, sipas të cilit pas 40 ditësh do të rivotohet ligji nga Kuvendi, ndërsa i sugjeroi Kryebashkiakut që për çdo paqartësi të lexojë faqen e Presidencës.

“Nuk kam asnjë koment, përveç faktit se cilido që ka kontestime apo vërejtje për kthimin e ligjit, e ftoj që t’i referohet gjithmonë faqes zyrtare të Presidentit të Republikës, pasi jam i sigurt që argumentet, të cilat janë dhënë nga Institucioni i Presidentit, bazohen vetëm në Kushtetutën e Republikës së Shqipërisë, në marrëveshjet ndërkombëtare ku ne jemi palë dhe të cilat janë të detyrueshme për t’u zbatuar, dhe padyshim në të gjithë legjislacionin tonë në fuqi, dhe gjithmonë duke vënë në plan të parë interesin tonë kombëtar dhe publik”, tha Meta.