Meta: Pakti detar me Greqinë, të bazohet në barazinë mes palëve. Bashkëpunim për drejtësinë

Është një proçes i cili duhet të bazohet në barazinë e palëve në raport me të drejtën ndërkombëtare dhe së dyti, edhe në respekt të Kushtetutës dhe legjislacionin përkatës.

Kështu u shpreh Presidenti Ilir Meta, në një konferencë për mediat sëbashku me homologen kroate, Kolinda Grabar-Kitarović, duke iu përgjigjur pyetjes mbi marrëveshjen mes Shqipërisë dhe Greqisë për kufirin detar.

“Nga ana ime si president, dua t’ju siguroj se do të bëj gjithçka për të përmbushur detyrimet e mia në mënyrën më konstruktive, por gjithmonë në respekt të Kushtetutës së vendit dhe të transparencës dhe bashkëpunimit si me qeverinë, ashtu edhe me Kuvendin e Shqipërisë, që kanë përgjegjësitë e tyre për këtë proces”, tha Meta.

Lidhur me vettingun dhe faktin se Gjykata Kushtetuese është jashtë çdo funksioni, ndërsa ajo e Lartë është e paralizuar, Presidenti theksoi se duhet bashkëpunim politik për të zgjidhur ngërçet që krijohen efektet e reformës në drejtësi, siç është plotësimi me anëtarë i Gjykatës Kushtetuese dhe asaj të Lartë.

“Reforma në drejtësi është shumë e thellë, madhore, komplekse. Duke shpresuar mbështetjen për ecurinë e kësaj reforme dua tu siguroj për përmbushjen e detyrimeve kushtetuese dhe ligjore që ka Presidenti për çështjet e drejtësisë në mënyrë më transparente.

Ashtu siç kam bërë më herët, dua të theksoj rëndësinë e bashkëpunimit mes qeverisë dhe opozitës për të kaluar çdo moment të vështirë që mund të vërë në vështirësi krijimin e institucioneve të drejtësisë”, theksoi ai.