Ministri i Delirit: Shqiptarët ndjehen të sigurt si në BE! Policia apolitike, kemi lënë pas Mbretërinë e Bashkuar, Spanjën, Francën…

I emëruar si Ministër i Brendshëm, Bledi Çuçi me daljen e tij publike sot dëshmoi se rilindasit e duan ministrin si Saimir Tahirin, Fatmir Xhafën dhe Sandër Lleshajn, Ministër të Delirit, dhe s’ka pse merret me punë të Brendshme.

Publikimi i studimit “Kënaqësia e publikut me punën e policisë në Shqipëri” të realizuar nga qeveria sudeze, tha sot Ministri shqiptar i Delirit, dëshmon se sa i përket sigurisë që ndjejnë qytetarët, mesatarja e Europës është 81%, e ne jemi 80%; Shqiptarët, sipas këtij anketimi mbi perceptimin e publikut për Policinë e Shtetit, japin shumë më pak ryshfet se në vitin 2013 ndërsa policia është shumë më pak e politizuar.

“Ndjehem shumë mirë për këtë komunikim të policisë me publikun dhe ndryshim të punës së policisë nga publiku. Sondazhi vjen në një moment pak specifik, javën e kaluar kemi përjetuar një situatë pak jo të zakonshme, por që nxori në sipërfaqe atë kategori njerëzish që s’lënë pa hedhur baltë mbi punën e policisë dhe gjithë qeverisë. Rezultatet kanë dalë para atyre ngjarjeve. Tregojnë vjeshtën e 2020 se si e përcakton publiku punën e bërë nga policia,” tha Çuçi duke shtuar se për pyetjen e marrjes së ryshfeteve nga policët, në 2013 ishte 74%, pra kaq qytetarë pranojnë se policët kërkojnë ryshfet, ndërsa sot jemi vetëm 57%.

Referuar po këtij sondazhi, ministri i ri i Delirit tha se Policia e Shtetit është sot shumë më pak e varur nga politika, është apolitike.

“Kemi lënë pas vende si Mbretëria e Bashkuar, Spanja apo Franca sa i përket perceptimit se sa e politizuar është Policia e Shtetit”.

Dhe jo vetëm kaq!

“Jemi drejt fundit sa i përket përgjegjësisë që ne si publik kemi për të bashkëpunuar me Policinë e Shtetit. Jemi larg mesatares së BE, por prapë kemi bërë përmirësim,” tha Bledi Çuçi duke falënderuar qeverinë suedeze që asiston që prej vitit 2013, për të rritur performancën, për t’i dhënë një fytyrë sa më komunitare Policisë së Shtetit.

Këtij falënderimi i bashkohen edhe qytetarët shqiptarë por duan të dinë se ku është bërë ky anketim që të shkojnë dhe të jetojnë në atë zonë, meqë nuk njohin zonë në Shqipëri ku mund të shkojnë për të blerë edhe bukë dhe janë të sigurtë; Ryshfet nuk japin vetëm ata që nuk kanë ndërsa policia është aq pak e varur nga politika sa për tu punësuar i drejtohen zyrave të FRESSH-it.

Për cilën Mbretëri të Bashkuar, Spanjë apo Francë e ka fjalën Çuçi, nuk është e qartë por për ato që njohin shqiptarët, Policia e Shtetit shqiptar jo që nuk i lënë pas, por nuk do ti përafrohet as gjysmës së nivelit të standardit që kanë. Kurrë! As atëherë…