“Ministria e Jashtme si RTSH”, dështimi ka emër: Edi Rama!
Dy amanetet e mia janë Ministria e Punëve të Jashtme dhe Televizioni Publik Shqiptar! Kjo ishte përmbyllja e fjalimit të gjatë të Kryeministrit Edi Rama para Grupit Parlamentar të Partisë Socialiste dhe nuk kishte se si të përmbyllej ndryshe nga një komunist, ndërsa fliste për dy institucione që e mbajtën gjallë komunizmin dhe i dhanë oksigjen edhe në periudhën e tranzicionit, kur Perëndimi mendoi se ky milet i hapi sytë me rënien e një busti!
Sot Edi Rama mund ti cilësoi dështim si televizionin publik shqiptar, RTSH, ashtu dhe Ministrinë e Punëve të Jashtme, por, nga këto institucione spiunësh u bë pis e gjithë shoqëria dhe sot partia e Ramës është në pushtet vetëm pse ato ekzistojnë!
Falë këtyre dy qerdheve spiunësh komunistë, sot ky vend nuk ka asnjë instituion privat që nuk e kontrollon partia e Edi Ramës, duke filluar nga Televizionet dhe Bankat e nivelit të Dytë që bota i njeh si private, Portet, Tatimet, Doganat dhe ata që i pagëzuan Oligarkë, pavarësisht se kush është në pushtet, me një qëllim të vetëm, kontrollin e kapitalit!
RTSH, impianti i partisë
Para Grupit Parlamentar të PS, Kryeministri Edi Rama e filloi këtë fundjavë duke u shpreh se RTSH duhet të shqyrtojë disa opsione siç janë mbyllja, riformatimi, privatizimi ose dhe partneriteti, dhe nuk do të vijojë më siç është, por, harroi se nga kjo qerdhe komuniste u ngritën dhe u bënë pis të gjitha televizionet private duke përfshirë këtu atë që ka për zemër partinë e Edi Ramës, Top Channel, dhe atë që Edi Rama e ka për zemër, TV Klan.
Televizionet private në Shqipëri mund të konsiderohen më modernet në aspektin teknologjik në Ballkanin Perëndimor, por, burimet njerëzore janë ajo që ka çaluar dhe çalon në shtetin e Edi Ramës, pavarësisht si i manipulonte mediat Fuga!
Falë RTSH, të gjitha televizionet ngritën burimet njerëzore me bazën e spiunimit dhe kontrollit të lajmit, edukatë kjo që pjelli edhe autocensurën, si tek gazetarët ashtu dhe drejtuesit dhe pronarët televizioneve.
Para se të na përrallos Edi Rama angazhimin e tij për krijimin e kushteve në RTSH, le ta bëjë një audit dhe ta bëjë publik se ku vajtën 26 milionë eurot dhe si lëvizën burimet njerëzore nga Top Channel drejt televizionit publik, një gjë e paparë në shtetet që u çliruan nga komunizmi dhe lëvizën drejt botës perëndimore duke mos cenuar publiken.
“Jemi munduar të krijojmë kushtet që televizioni publik të reformohet dhe kemi dështuar. Nuk e di çfarë do të bëjë drejtuesja e re, por deri tani bilanci i televizionit publik është dështim i suksesshëm. Që do të thotë nga borxhi në borxh dhe nga mospërfillja në mospërfillje.
Kemi një kanal atje. Unë personalisht, hera e fundit që e kam parë televizionin publik ishte para vitit 1990, para përmbysjes, kur thonin ishin ca protesta. Që atëherë, unë nuk i kam parë. Kam shkuar, kam dhënë intervista, por as intervistat e mia nuk i kam parë.
Duhet ndarë mendja, drejtuesit e televizionit publik të gjithë e dinë, nga unë nuk kanë marrë kurrë asnjë mesazh sepse unë nuk e shoh. Dhe kur ndonjëri nga ju më dërgon mesazhi: ‘Shih ç’po bën televizioni publik’, unë habitem. Si e ndjek? Por ama të gjithë i kam takuar pasi janë zgjedhur.
I kam thënë vetëm një gjë, mbylleni. Nxirrni në ekran: ‘Televizioni Publik Shqiptar i kërkon ndjesë popullit shqiptar. I kërkon ndjesë të gjitha familjeve në Republikën e Shqipërisë dhe jashtë saj, i kërkon ndjesë dhe për të gjithë ata që nuk jetojnë më dhe që kanë qenë të detyruar të marrin shërbimin më mizerabël publik në glob. Ju premtojmë se do të kthehemi në ekran kur të jemi gati’. Të bëjnë reformë. Si ka mundësi që televizionet e tjera, me më shumë pak buxhet marrin më shumë sukses. Sepse buxhetin e tyre nuk e kanë të garantuar. Duhet ta krijojnë çdo ditë,” çuditet Edi Rama por nuk shfaq po këtë emocion kur në emër të tij, televizionet e zemrës dhe zorrës së trashë, marrin reklama duke folur në emër të Kryeministrit, e Edi Rama i cili hyri në politik që në vitin 1998 asnjëherë nuk e pyeti as veten, sepse Tanin e Sandrin jo se jo, si arritën ta marrin arkivin e RTSH-së, meqë televizionin publik nuk e shikon.
“E duan të drejtën e FSHF-së për të transmetuar ndeshjet e Kombëtares sepse Kombëtarja duhet të transmetohet në televizionin publik, por lekët nuk i paguajnë. Pse? Doni lekët tona, shkoni te qeveria. Nuk kemi për t’i dhënë televizionit publik asnjë lek nga taksat e shqiptarëve, derisa televizioni publik t’i meritojë taksat e shqiptarëve.
Mendoj se çdo opsion duhet të jetë në tavolinë. Edhe mbyllja përfundimtare, edhe privatizimi, edhe partneriteti, përveç kësaj që është. Por unë nuk marr pjesë në këtë,” tha ndër të tjera Edi Rama pa i treguar të paktën Grupit Parlamentar pse shtetet tjera e kanë pa pagesë ndeshjen e kombëtares dhe pse nuk u mbyll asnjëri prej televizioneve publike as në shtetet që kemi rrotull!
Sepse mileti e ka të qartë, sikur Edi Rama mos ta shikonte RTSH-në, shqetësim nuk do të ishte menaxhimi nga Drejtori i Përgjithshëm, Thoma Gëllçi, për të cilin devijim, sapo televizionit publik ia dha publikut dhe preku shikueshmërinë e televizioneve të zemrës së Kryeministrit, përfundoi në pranga!
Mbyllja ose Privatizimi është një epilog i RTSH-së që përflitet që nga dita e parë kur Edi Rama e mori pushtetin e deri sa i hapi gojën Batonit, ndërsa Partneriteti iu bashkua gojëve të liga së bashku me një Kullë, pasi u përqafua nga mileti ideja komuniste që u zbatua në jetë vetëm pak metra nga RTSH, Stadium me Kullë!
Në fund, nëse ka diçka që ta shpif në RTSH në ekstrem është politika redaksionale e lajmeve! Vërtetë nuk mund të shihet si në televizionet e tij të zemrës se si Lali Eri përuron qerdhe ndërsa në realitet po arrestohet nga SPAK-u, por, televizioni publik është një institucion mediatik që nuk e gëlltit dot në lajme arrestimin e qoftë një ministri të Edi Ramës nga SPAK, siç bëri me ish-drejtorin e tyre, dhe kjo dramë mediatike nuk ka se si të mbyllet ndryshe përveç se me njërën ndër marrëzitë epike të Kryeministrit:
T’fala Sandrit!
Ministria e Punëve të Jashtme si partia
Në fjalimin e tij të gjatë para Grupit Parlamentar, Edi Rama tha pas 13 vjetësh si Kryeministër se përveç televizionit publik, RTSH, një tjetër dështim i madh i qeverisë është Ministria e Punëve të Jashtme.
Sa larg është nga realiteti i Ministrisë së Punëve të Jashtme nuk e tregoi ky fjalim ku konstatoi se punojnë vetëm tre veta, ministrja, sekretarja dhe roja, por shihet qartë se Edi Rama e konsideron diplomacinë ashtu si parardhësi i tij Enver Hoxha; Vetëm se ai kërcënonte Stalinin ky kërcënon Putinin, ai fliste përralla mbi krijimin e OKB-së ky zgjatë hapin dhe flet për drejtimin e Këshillit të Sigurimit!
“Sa i përket ligjit për diplomacinë publike. Ministria e Jashtme është si televizioni publik shqiptar. Është një tjetër dështim i madh i yni. E kam thënë dhe po e them. Nuk është një institucion në funksion të këtyre sfidave sepse nuk është reformuar asnjëherë. Edhe një ligj që e bëmë nuk ishte ligj apo reformë, ishte tualet.
Makijazh! Ligji duhet të hapë rrugën për reformë, për të futur ajrin e pastër. Shqipëria ka sot njerëz plot jashtë në diasporë. Diaspora është pjesë e elektoratit të rëndësishme. Gradat janë marrë peng nga spikerat e politikës së jashtme të televizionit, as televizion nuk është se ata as nuk dalin. Sa herë shkoj në atë ministri, më duket sikur atje është vetëm ministri, sekretarja dhe roja,” thotë Edi Rama dhe ndonëse e prek fjalën Reformë harron se ajo nuk është bërë për Ministrinë por për punësimin e Patronazhistëve!
Ligjin për Diplomacinë Publike e quan makijazh ndonëse ai është një turp, që shqiptarët e kishin parë vetëm në diktaturën komuniste, dhe sikur të kishte njohuritë elementare për këtë institucion do ta thoshte ngjashmërinë e frikshme që Ministria e Jashtme ka me RTSH-në përveç pjelljes së spiunëve, punësimin e fëmijëve të punësuarëve kur dalin në pension!
Nëse diçka të vlefshme kishte kjo Ministri që ka funksionuar si për mirë ashtu dhe për keq dhe pa spontanitet ishte Drejtoria për Diasporën, e cila nëse asgjë tjetër kishte kontaktet me çdo shoqatë shqiptare në botë, dhe, sot, kur Edi Rama i do ata për votë sepse nuk e voton njeri në Shqipëri, ai e thotë me zë se është shumë e rëndësishme që të mbahen kontaktet me Diasporën.
“Vijmë tek Diaspora. Është shumë e rëndësishme që në aspektin e diplomacisë, sa i përket parlamentit edhe grupet e miqësisë të angazhohen siç do angazhohet kryetari i Kuvendit dhe të gjithë ata që shkojnë jashtë të përfshihen në kontaktin me shqiptarët. Kontaktin me diasporën do e mbajmë, na duhet një kontakt i vazhdueshëm!”
Në fund, tufa e deleve që kishte përpara dëgjoi dhe dy amanetet e liderit të tyre shpirtëror, Ministrinë e Punëve të Jashtme dhe televizionin publik shqiptar, RTSH, por askush nuk dëgjoi fjalën BE që për të dy këto institucione është fjalë e panjohur edhe pse për dy vitet e ardhshme Kryeministri premtoi mbylljen e kapitujve të negocimit me Bashkimin Evropian dhe pashaportën evropiane!
Nëse Edi Rama nuk e ka ndër mend për momentin ta mbyllë Ministrinë e Punëve të Jashtme është mirë që ta vënë në punë të paktën njërin nga katet e asaj godine aq të madhe, me përkthyes që do të shqipërojnë të paktën rrugëtimin e anëtarësimit të Kroacisë dhe Slovenisë në BE, ashtu si dhe harmonizimin e ligjeve!
Sepse, vetëm të imagjinosh harmonizimin e ligjeve evropiane me jurisprudencen shqiptare nga Ulsi Manja ose Besfort Lamallari, dy amanetet e Kryeministrit të avullohen nga mendja ndërsa Mamica e Edi Ramës të duket si Sekretarja e Shtetit, Madeleine Albright!
T’fala Ditmirit!
