Miratohet kërkesa për arrestimin e Arben Ahmetajt, tre deputetë abstenuan
Me 117 vota për dhe 3 abstenime, Parlamenti i Shqipërisë ka miratuar kërkesën e SPAK për arrestimin e Arben Ahmetajt.
Përkundër pritshmërive, të gjithë deputetë socialistë prezent votuan për arrestimin e kolegut të tyre Arben Ahmetaj duke përfshirë dhe kryeministrin Edi Rama ndërsa tre deputetët që abstenuan ishin: kreu i PBDNJ, Vangjel Dule, kryetari i PAA, Agron Duka dhe kryetari i Partisë Republikane, Fatmir Mediu.
Para votimit u lexuan dy raporte, nga PD dhe PS!
Në emër të PD-së, Gazment Bardhi prezantoi raportin e Partisë Demokratike, mbi kërkesën e SPAK për arrestimin e Deputetit të Partisë Socialiste, Arben Ahmetaj.
“Arben Ahmetaj me akuzat e ngritura nga SPAK rrezikon deri në 15 vite burg. Ai akuzohet për “Korrupsion”, “Fshehje të Pasurisë” dhe “Pastrim të parave”.
Partia Demokratike e ka denoncuar këtë aferë duke nisur nga viti 2018, po kryeministri, ministrat deputetë e PS, jo vetëm nuk na dëgjuan, por filluan të na sulmonin, tallnin, të na intimidonin. Dua të falënderoj për këtë kryetaren e komisionit hetimor, Jorida Tabakun. Po ashtu anëtarët e komisionit, Këlliçin, Zhupën, Boçin, Spahon. Secili prej tyre, siç tregon edhe dosja e Prokurorisë i dhanë informacion të bollshëm hetuesve, që të vijmë në këtë kërkesë që njeriu i Ramës, më i besuari, rrezikon jo më pak se 15 vite burg. Pa asnjë dyshim, pjesë e këtij hetimi do duhet të jetë koka e aferës, ai është kryeministri Edi Rama,” tha Bardhi duke shtuar:
“Pa ndihmën e Ramës as Ahmetaj dhe ministrat e kësaj qeverie nuk mund të miratoheshin 17 vendime brenda ditës. Ato projektvendime janë dërguar nga PC i Koldian Zotos në mbledhjen e këshillit të ministrave, janë futur në mbledhje qeverie dhe 17 vendime janë miratuar brenda ditës. Ahmetaj dhe Zoto i’u ka përdorur në tre raste, tre projektligje të hartuara në zyrën e Zotos kanë shkuar në zyrën e Ahmetajt, Ramës dhe më pas ju keni ngritur kartonin për t’i votuar ato ligje. Unë e di që sot me zemër një pjesë janë me këtë krah të seancës plenare”, tha më tej Bardhi.
Në fund, Gazment Bardhi i bëri thirrje Kryeministrit Edi Rama ta dorëzoi para drejtësisë Arben Ahmetajn. Ndërsa ish zv kryeministrit, Bardhi i bëri thirrje që të bashkëpunojë me drejtësinë për të zbardhur plotësisht këtë që Partia Demokratike e cilëson si një aferë korruptive.
Partia Demokratike në raportin e saj kërkon heqjen e imunitetit për Deputetin Socialist, Arben Ahmetaj.
Ndryshe nga PD, në prag të fillimit të seancës Partia Socialiste bëri publik Raportin ku bëhet e ditur se Arben Ahmetaj do ti dorëzohet SPAK-ut, ndërsa deputeti i PS, Arben Pëllumbi, e prezantoi në Parlament ku u shpreh:
“Është vetëm gjykata, organi i vetëm që mund të marrë në shqyrtim, të çmojë dhe në fund të disponojë në lidhje me kërkesat e organit të prokurorisë gjatë hetimeve paraprake në rast se i gjen eventualisht të mbështetura në prova dhe në ligj. Është gjykata ajo që garanton respektimin e të drejtave të njeriut në të gjithë hallkat e procesit penal.
Procesin e rregullt ligjor, garancitë procedurale, kushtet dhe kriteret që parashikohen në ligjin procedural si dhe zbatimin e parimit të proporcionalitetit të masës së sigurimit me kërkesat dhe faktet që i paraqiten për gjykim,” tha Arben Pëllumbi.
Ndryshe, Parlamenti i Shqipërisë sot zhvilloi një seancë të posaç me vetëm një pikë të rendit të ditës:
1. Shqyrtimi i kërkesës nr.9431 Prot., datë 7.7.2023 të Prokurorisë së Posaçme kundër Korrupsionit dhe Krimit të Organizuar, depozituar në Kuvendin e Shqipërisë, per dhenien e autorizimi nga Kuvendi per arrestimin/heqjen e lirise dhe ushtrimin e kontrollit personal/te baneses se deputetit Arben Ahmetaj.
