Belgjika: Kosova duhet të jetë anëtare e asociuar e Asamblesë Parlamentare të NATO-s

Kreu i delegacionit belg në Asamblenë Parlamentare të NATO-s, Theo Francken, tha se Belgjika është pro anëtarësimit të Kosovës në AP të NATO-s, si anëtare e asociuar.

Theo Francken, raporton RFE, bashkë me një delegacion nga Parlamenti Federal i Belgjikës, u takua sot me delegacionin e Parlamentit të Kosovës në Asamblenë Parlamentare të NATO-s.

“Kosova mund dhe duhet të jetë anëtare e asociuar e Asamblesë Parlamentare të NATO-s, ky do të ishte një hap i mirë i integrimit. AP-ja e NATO-s e ka të rëndëishme ta diskutojnë stabilitetin dhe sigurinë në Ballkanin Perëndimor, kjo mbetet prioritet për ne,” tha Francken pas takimit.

Aktualisht, Parlamenti i Kosovës është pjesë e kësaj Asambleje Parlamentare si “delegacion vëzhgues”, njëjtë si Australia, Egjipti, Japonia, Korea e Jugut, Kazakistani, Palestina dhe Tunizia. Ndërsa, Shqipëria, Mali i Zi, Maqedonia e Veriut janë delegacione anëtare.

Nëse Kosova bëhet anëtare e këtij organi si delegacion i asociuar, ajo do t’i bashkohej Serbisë dhe Bosnje Hercegovinës nga rajoni.

Vizita e delegacionit bleg, raporton RFE, vjen në një kohë tensionesh në veri të Kosovës, shkaku i të cilave NATO ka angazhuar 700 trupa shtesë në Kosovë, përveç 4.000 trupave që veçse janë të dislokuar në Kosovë.