Miratohet rritja e pagave të administratës! Ata që ishin, do vazhdojnë të jenë të varfër!

Projektligji për “Për disa ndryshime në ligjin nr. 9584, datë 17.07.2006, “Për pagat, shpërblimet dhe strukturat e institucioneve të pavarura kushtetuese dhe të institucioneve të tjera të pavarura, të krijuara me ligj”, të ndryshuar”, u miratua sot në Parlamentin e Shqipërisë me 95 vota për , 3 kundër, 0 abstenime, ashtu si dhe Projektligji “Për kompetencat për caktimin e pagave, trajtimeve të tjera financiare dhe përfitimeve të të punësuarve në institucionet e administratës publike, si dhe të pagës bazë minimale në shkallë vendi” me 97 vota për , 2 kundër dhe 0 abstenime, ndonëse Kryetari i Partisë Demokratike, Sali Berisha, kërkoi që para këtij procesi të votohet minimumi jetik prej 200 eurove ndryshe nuk do të votojnë kët lloj rritje të pagave!

Por, siç duket Kryeministri Edi Rama nuk ka probleme me votat edhe kur nuk i ka “kërpëratat” nëpër këmbë! Madje u konstatua se as Bedelët e Bashës nuk e kanë problem se kë kanë për kryetar të grupit parlamentar, Enkelejd Alibeaj ose Gazment Bardhi, i rëndësishëm është shefi i shefit të tyre, Edi Rama!

Nga kjo rritje e pagave do të përfitojnë 130.330 punonjës të administratës ndërsa do të preken edhe 250 funksionarë politikë që e kanë pagën të lidhur me presidentin.

Kështu, paga e Presidentit ishte 257.000 lekë dhe do të bëhet 425.000 lekë; Paga e Kryetarit të Parlamentit ishte 228.730 lekë dhe do të bëhet 393.125; Paga e Kryeministrit ishte 228.730 lekë dhe do të bëhet 393.125 lekë Paga e Zv.Kryeministrit ishte 187.000 lekë dhe do të bëhet 330.000 lekë; Paga e Ministrave ishte 174.760 lekë dhe do të bëhet 318.750 lekë; Paga e Deputetit ishte 156.770 lekë dhe do bëhet 310.250 lekë; Dhe, në fund, paga e Specialistit ishte 69.219 dhe do të bëhet 191.250.

Ndryshe, politika e rritjes së pagave shtrihet në dy vite ndërsa kostoja totale e kësaj politike më 1 janar 2025 shkon 39 miliardë lekë. Prej të cilave 1 miliardë lekë përllogaritet efekti financiar i zbatimit të vendimit të Gjykatës Kushtetuese për vitin 2023.

Ata që ishin të punësuar do kenë paga më të mëdha, varfëria do të vazhdoj të rritet ashtu si dhe pagat që propozoi Kryeministri, ndërsa të papunët së bashku me pensionistët do të duhet të presin ashtu si dhe varfëria edhe dy vite, kur radha u vjen zgjedhjeve dhe mëshirës së radhës nga Edi Rama!