“Mos dilni…” Interneti, Rama: Paketat celulare 50% më lirë, falas aksesi edukativ
Kryeministri Edi Rama iu bëri edhe një herë thirrje të gjithë qytetarëve shqiptarë të zbatojnë masat e marra për ngadalësimin e përhapjes së koronavirusit. E pavërtetë është që të rinjtë dhe fëmijët nuk preken nga ky virus, tha Rama duke shtuar se sot në Izrael po luftohet për jetën e një fëmije 9 vjeç ndërsa iu drejtua të rinjve, duke iu kërkuar të mos dalin nga shtëpitë, pasi ata mund ta marrin virusin dhe t’ua çojnë familjarëve, por mund të rrezikojnë edhe jetën e tyre.
Me këtë rast Edi Rama i dha fund sot edhe dilemës për internetin falas në kohën kur të gjithë janë të izoluar në shtëpi si masë mbrojtëse ndaj përhapjes së koronavirusit. Duke filluar nga nesër të gjithë qytetarët do kenë paketa internet 50% më të lira, deri në 5 javë ndërsa mund të aksesohen falas të gjitha programet edukative dhe mësimore për nxënësit.
“Falë bashkëpunimit dhe mirëkuptimit është siguruar me gjithë vështirësisë kudo ku ka qënë e mundur aksesi në pikat kryesore të shitjes dhe shërbimi ndaj klienientit. Teknikët do të jenë në terren për mirëmbajtjen e rrjeteve, në funksion të situatës do të jenë edhe ekipet teknike. Përmes AKEP kemi ngarkuar sipërmarrësit të ofrojnë për pajtimtarët mundësi shfrytëzimi maksimal dhe cilësor me kushte sa me të favorshme. Edhe pas testeve teknike që janë bërë dhe janë koordinuar në vendimarrje lidhur me ofertat e vlefshme nga nesër deri në fund të prillit do të ofrohet oferta me 50% internet për 5 javë, falas do të jetë RTSH dhe cdo format edukativ. Abonentët me kontratë fikse kanë akses në platformat për fëmijë 60% më lire,” tha Kryeministri Rama duke shtuar:
“Përgjegjshmëria është shumë e rëndësishme. Patjetër që interneti në këto kohë është shumë i rëndësishëm, por kurseni ato komentet që bëni në këtë faqe. E rëndësishme është që këtë kohë ta shfrytëzojmë bashkarisht, të lidhur me besë a besë”.
Ndërkohë për të rinjtë Kryeministri Edi Rama kishte një mesazh të veçantë:
“Po bëni të gjithë një përpjekje historike. Duhet të dilni në oraret e caktuara dhe të pa shoqëruar. Janë pa kata që nuk respektojnë ligjin e ‘luftës’, por mund të na e bëjnë këtë luftë një tragjedi kombëtare, me shifra të paimagjinueshme. Ky armik i verbër merr në botën tjetër përgjithësisht ata që janë më të moshuar dhe më të dobët, por është e pavërtetë që të rinjtë janë të paprekshëm, madje edhe fëmijët nuk janë 100% të paprekshëm.
Sot në Izarel luftohet për jetën e një fëmije 9 vjeç. Prandaj, ju lutem të rinjve, që dalin të luajnë, të mos lëvizin nga shtëpia për asnjë aryse në botë, sepse jo vetëm mund të transportojnë bombat kur kthehen në shtëpi e të vrasin familjarët, por mos e dhëntë Zoti, mund të humbasin edhe jetën e tyre.”
