Mungesa e librave shqip, sfidë për gjimnazistët e Luginës Preshevës

Në Luginën e Preshevës janë katër shkolla të mesme në gjuhën shqipe, por nxënësit shqiptarë vazhdojnë të kenë probleme me tekstet në gjuhën amtare. Në Luginë kërkojnë që të gjendet një zgjidhje mes dy qeverive, Kosovës dhe Serbisë, për tekstet dhe plan-programet.

Ajan Hajrullahu nga Presheva është fitues i shumë çmimeve në gara shkencore, e të fundit e ka fituar në matematikë. Ai sapo ka përfunduar shkollën fillore. Tregon se pavarësisht sukseseve, ka pasur sfida të mëdha, për shkak të mungesës së teksteve në gjuhën shqipe.

Ajan thotë se për t’i arritur këto rezultate është dashur shumë angazhim. “Më është dashur të mësoj”, thotë ai.

Edhe mësimdhënësit në shkollat e mesme shqipe në Luginën e Preshevës kanë vështirësi në mungesë të librave në gjuhën shqipe, sepse ata nga gjuha serbe duhet t’i përshtatin me plan-programin.

Shpresa Abdullahu është profesore në Shkollën e Mesme Teknike “Presheva”. Ajo thotë se ka vështirësi të mëdha edhe për mësimdhënës mungesa e teksteve shkollore në gjuhen shqipe, derisa thotë se ka shumë nxënës të mirë.

E drejtori i gjimnazit “Skënderbeu” në Preshevë, Nadër Sadiku, tha se gjasat janë vogla për furnizim me tekste shkollore, pa një marrëveshje mes dy qeverive, asaj të Kosovës dhe të Serbisë,

“Duhet një marrëveshje mes të Kosovës dhe Serbisë për çështjen e testeve në mënyrë që edhe plan-programi të përshtatet,” tha Nadër Sadiku sot kur ende nuk dihet nëse Ministria e Arsimit e Kosovës do të mundësojë furnizimin me tekste shkollore në gjuhën shqipe të shkollave të mesme në Preshevë.

Ndryshe, Qeveria e Kosovës ka financuar Luginën e Preshevës për blerjen e teksteve shkollore për nxënësit e shkollave fillore.