Murati: LDK ka më shumë kërkesa sot, se kur mendonte që ishte e para!

Pas kërkesës së fundit të LDK-së për qeverisje me kushtin që posti i Presidentit për Lidhjen Demokratike të Kosovës të përfshihet në Marrëveshje, ka reaguar deputeti i Lëvizjes Vetëvendosje, Hekuran Murati, duke theksuar se sot kur kjo parti është renditur e dyta në zgjedhje, ka kërkesa më të mëdha se sa atëherë kur mendonin se ishin të parët.

“Oferta e Fituesit për të harmonizuar programin me partnerin qeverisës si dhe për të ndarë përgjegjësinë e qeverisjes përgjysmë, është ofertë tejet gjeneroze. Kjo në vetvete tregon për vullnetin e Fituesit që, të arrihet një marrëveshje e cila respekton partnerin dhe siguron mirëbesim në qeverisje,” thekson Hekuran Murati përmes rrjetit social Facebook duke sjellë në vëmendje se pala tjetër para zgjedhjeve, kur mendonte se do dilte e para, thanë se posti i Kryeministrit do duhej t’i takonte Fituesit. Pas zgjedhjeve, ka gati dy muaj që nëpër studio televizive flasin për koeficientë e për pesha të posteve.

“Para zgjedhjeve, kur mendonin se do dilnin të parët, thanë se posti i Presidentit nuk duhet të jetë pjesë e diskutimeve për formimin e qeverisë, sepse kandidati do duhej të ishte konsensual. Pas zgjedhjeve, nga vendi i dytë, thonë se posti i Presidentit u takon, dhe nuk bën ndryshe,” thekson deputeti i Lëvizjes Vetëvendosje, Hekuran Murati, duke iu bashkuar armatës së atyre që sulmojnë dhe madje akuzojnë nga mëngjesi deri në darkë partnerin e tyre të koalicionit, LDK, me të cilin e kanë projektuar rimëkëmbjen e vendit.