Shoku i klasës ulet në kolltukun e Arta Markut, Kryeprokurori i ri vlerëson shkatërrimin që i bëri Prokurorisë!
Bazuar në momentet e para që mori detyrën, Prokurori i Përgjithshëm i ri, Olsian Çela nuk është shpresëdhënës për punën që do të bëjë në krye të organit të akuzës.
Fillimisht, shpresëdhënës nuk ishte fakti se Kryeprokurorin e ri e kishte shok klase, më pasi atij nuk i punoi mikrofoni, fakt të cilin Olsian Çela e konsideroi si një “fillim me probleme”, por shije shumë të keqe jo vetëm për prokurorët la kur e vlerësoi punën e Arta Markut si më të mirën e mundshme ndonëse horizontalisht dhe vertikalisht, ishte Prokurorja e Përgjithshme e përkohshme që e shkatërroi Prokurorinë.
“Jam munduar që prej ditës së parë të punoj me përkushtim e integritet ashtu siç duhet të bëjë çdo zyrtar i këtij shteti. Dua të falënderoj prokurorët dhe gjithë stafin që më kanë ndihmuar në përballimin e sfidave në këto 2 vite, ndihma juaj më ka dhënë një eksperiencë të shkëlqyer. Falënderoj përfaqësuesit e OPDAT dhe Euralius më kanë mbështetur ne çdo iniciativë. Falënderim të veçantë për median, hapësirën që më keni përkushtuar qoftë kur keni qenë dashamirës apo edhe më pak roli juaj na bën më të përgjegjshëm. Urime prokurorit, kam besim që Prokuroria do ecë përpara në përmbushjen e misionit të saj kushtetues jam shumë e lumtur që detyrën ia pasoj një shokut tim të klasës, e jam e sigurt që do kaloni shumë mirë me të”.
Pasi u prezantua nga shoqja e klasës, Kryeprokurori i ri Olsian Çela tha se ishte një surprizë e bukur se ndoshta është hera e parë që ndodh kalimi nga një prokuror në një tjetër.
“E vlerësoj se sot është më e rëndësishme se kurrë më parë transparenca që duhet të sigurojmë ndaj medias e publikut si mënyra më e mirë për të rritur besimin e institucioneve tek puna e prokurorisë. E falënderoj kryeprokuroren Arta Marku për punën e bërë gjatë këtyre 2 viteve e vlerësoj se e ka bërë në një fazë mjaft të vështirë, tranzicioni ku vendi është përballur me probleme të mëdha e delikate. Besoj se ka bërë më të mirën e mundshme në këto kushte.”
Sot, Kryeprokurori i ri mendon se pason një fazë e re:
“Tani hyjmë në një fazë të re, ka një konceptim tërësor të shtetit të së drejtës, institucioneve kushtetuese ku prokuroria ka pësuar edhe ndryshimet më rrënjësore dhe kërkon një angazhim e konceptim të ri për mënyrën si ky organ do funksionojë. Janë mundësitë dhe mbështetja e kapacitetet për ti dhënë vendit një të ardhme më të mirë, që Shqipëria të bëhet pjesë e familjes së madhe evropiane ku rezultatet e punës sonë kanë në rëndësi të jashtëzakonshme.”
Lidhur me situatën e rëndë nëpër të cilën po kalon vendi pas tërmetit tragjik të 26 Nëntorit Olsian Çela shprehet:
“Sot ne ndodhemi në një fazë të vështirë, vendi po përballet me një krizë për shkak të ngjarjeve të fundit të muajit nëntor. Përgjigja që prokuroria duhet të japë në rastin konkret duhet të jetë, spikasë në raport me atë që po bëjnë institucionet e tjera, pasi njerëzit kërkojnë drejtësi, dhe gjërat të bëhen konkrete. Është një rast që jemi në lartësinë e asaj që pret vendi dhe njerëzit presin. Do të gjejmë të gjithë mekanizmat për të arritur atë që populli pret në raport me prokurorinë. Çdo gjë nuk shkon, vaj ndryshimet gjithmonë janë pozitive. Vendi është në rrugën e duhur dhe e ardhmja do të jetë më e mirë”.
