Nd/Sekretari i Shtetit: Shkaktimi i trazirave në veri nënkupton përballje me NATO-n!
Nd/Sekretari amerikan i Shtetit për Çështje Evropiane dhe Euroaziatike, James O’Brien, ka paralajmëruar sot Kosovën dhe Serbinë se shkaktimi i trazirave në veri të Kosovës nënkupton përballje me NATO-n.
“Është e rëndësishme që të dyja palët ta kuptojnë se, nëse ndodh ndonjë trazirë në veri, kjo nënkupton përballje me NATO-n,” tha O’Brien, raporton RFE, duke e bërë të qartë se veriu i Kosovës duhet të jetë i qetë dhe i sigurt në mënyrë që Kosova dhe Serbia të shënojnë përparim politik në rrugën e tyre drejt Bashkimit Evropian.
Komentet e O’Brien vijnë në një kohë kur NATO-ja po mendon ta shtojë praninë e përhershme në Kosovë përmes misionit të vet paqeruajtës, KFOR.
Nd/Sekretari amerikan i Shtetit, James O’Briense, tha se Sekretari amerikan i Shtetit, Antony Blinken, do të bisedojë për rritjen e tensioneve në Ballkanin Perëndimor gjatë takimit dyditor të ministrave të Punëve të Jashtme të shteteve të NATO-s në Bruksel.
Ndërkohë në këtë takim të Ministrave të Jashtëm të Shteteve anëtare të NATO-s i cili filloi sot në Bruksel ka filluar të trajtohet situata në Ballkanin Perëndimor, me vëmendje të veçantë në situatën në veri të Kosovës, pas tensioneve të fundit në veri, ndërsa pritet të diskutohet mundësia e përforcimit afatgjatë të misionit paqeruajtës të KFOR-it në Kosovë.
Në prag të këtij takimi, Sekretari i Përgjithshëm i NATO-s, Jens Stoltenberg, tha se Kosova dhe Serbia duhet të përmbahen nga retorika nxitëse dhe të mos ndërmarrim veprime që mund të tensionojnë edhe më shumë situatën.
“Sapo kemi rritur prezencën në Kosovë, duke shtuar ekstra trupa. Ne tani jemi duke vlerësuar nëse duhet të shtojmë më shumë trupa, por ne jemi duke ndërmarrë hapa të rëndësishëm me rritjen e prezencës tonë,” tha Jens Stoltenberg për shtimin e trupave, mundësi për të cilën foli edhe gjatë një vizite në Prishtinë më 20 nëntor.
Sekretari i Përgjithshëm i NATO-s, Jens Stoltenberg, i dërgoi një mesazh të posaçëm Serbisë dhe Kosovës që të avancojnë në procesin e normalizimit të raporteve, që ndërmjetësohet nga Bashkimi Evropian.
“Ne ftojmë Beogradin dhe Prishtinën që të angazhohen në dialogun, e mbështetur nga BE-ja, në mirëbesim, dhe gjithashtu besojmë se propozimi i ri për Asociacionin e komunave me shumicë serbe mund të jetë një hap i rëndësishëm për dialogun dhe që ky proces të jetë më konstruktiv.”
Ndryshe, aktualisht në Kosovë janë 4.687 trupa në kuadër të misionit paqeruajtës të KFOR-it.
