Ndryshimet në Kodin Penal, ndalohet mohimi i gjenocidit në Bosnje! Serbët e hedhin poshtë…

Përfaqësuesi i lartë në Bosnje Hercegovinë, Valentin Inzko, bazuar në Kompetencat e Bonit ka bërë ndryshime në Kodin Penal të BeH me të cilat ndalohet dhe dënohet mohimi i gjenocidit. Pas këtij vendimi, menjëherë ka reaguar përfaqësuesi serb në Presidencën e Bosnje Hercegovinës, Milorad Dodik duke e hedhur poshtë dhe duke e akuzuar Inzkon si njeri që urren serbët.

Pavarësisht reagimit dhe etiketimeve të serbit më kriminal në Bosnje Hercegovinë, Milorad Dodik, Zyra e Përfaqësuesit të lartë ka sqaruar se ky Ligj me nenet përkatëse hyn në fuqi menjëherë, deri sa Parlamenti i BeH nuk e miraton në formën që është, pa ndryshime dhe plotësime dhe pa asnjë kushtëzim.

Teksti i ndryshimit në Kodin Penal që ka vendosur Inzko, në dy nene thekson:

“Kush nxitë publikisht dhunën ose urrejtjen e drejtuar kundër grupit të personave ose anëtarëve të grupit të caktuar duke pasur parasysh racën, ngjyrën e lëkurës, besimin fetar, prejardhjen ose përkatësinë kombëtare ose etnike, nëse një sjellje e tillë nuk paraqet vepër penale nga pika (1) e këtij neni, do të dënohet me burg prej 3 muajve deri në 3 vjet.”

Me ndryshimin në nenin 3 (3), Inzko thekson:

“Kush miraton publikisht, mohon, zvogëlon ose bënë përpjekje që të arsyetoj krimin e gjenocidit, krimin kundër njerëzimit ose krimin e luftës të përcaktuar me një vendim të formës së prerë në përputhje me Kartën e Gjykatës Ndërkombëtare të Gjykatës Ushtarake shoqëruar me Marrëveshjen e Londrës nga 8 Gushti I vitit 1945 ose Gjykatës Ndërkombëtare Penale ose gjykatës në Bosnje Hercegovinë, e drejtuar kundër grupit të personave ose anëtarëve të grupit të caktuar duke pasur parasysh racën, ngjyrën e lëkurës, besimin fetar, prejardhjen ose përkatësinë kombëtare ose etnike, në mënyrën që mund të nxis dhunë ose urrejtje drejtuar kundër një grupi të tillë ose anëtarëve të atij grupi, do të dënohet me burg prej 6 muaj deri në 5 vjet.”

Ndryshimet e ligjit nënkuptojnë që kush kryen këto vepra penale nga nenet prej (1) deri (3) të këtij neni duke i bërë të ditur opinionit publik ose i shpërndanë afishe, foto ose materiale tjera, do të dënohet me burg prej së paku një viti.

E nëse kjo vepër penale kryhet duke prishur rendin dhe qetësinë publike ose është kërcënuese, fyese ose keqtrajtuese, kryesi i veprës do të dënohet me burg të paktën 3 vjet.

Dënimin me 3 vjet burg do ta vuan çdo person që ndanë mirënjohje, dekorata, përkujtimore, ose çfarëdo lloj përkujtimi ose jep privilegje personit i cili është dënuar me dënim të formës së prerë për gjenocid, krim kundër njerëzimit ose krim lufte, ose emëron një objekt publik siç janë rruga, sheshi, parku, ura, institucioni, komuna, ose qyteti, lagja ose vendi I banuar…

Në arsyetimin e këtij vendimi Inzko thekson se të vetëdijshëm nga fakti se pajtimi nuk mund të bëhet pa pranimin e krimit dhe përgjegjësisë, si dhe gjuha e urrejtjes, dhe lavdërimi i krimieve të luftës dhe revizionizmi ose mohimi i hapur i gjenocidit, krimit kundër njerëzimit dhe krimeve të luftës të përcaktuar me vendim gjyqësore të formës së prerë, kërcënojnë sundimin e ligjit dhe paraqesin pengesën e drejtëpërdrejtë për paqe, pajtim dhe ndërtim të besimit e në fund kërcënojnë edhe mundësitë për një të ardhme të sigurt, paqësore të Bosnje Hercegovinës.

Në fund, Inzko thekson se është shumë i shqetësuar se individ të njohur dhe institucionet pubike në Bosnje Hercegovinë vazhdojnë të mohojnë se aktet e gjenocidit, krimi kundër njerëzimit dhe krimi i lfutës janë kryer gjatë konfliktit të armatosur, me të cilin individ dhe pushtete publike sjellin në pikëpyetje legjitimitetin e vendimeve të Gjykatës Ndërkombëtare për Ish-Jugosllavinë dhe Gjykata e Bosnje Hercegovinës dhe se individ dhe organe të pushtetit festojnë ose lavdërojnë kriminelët e dënuar të luftës.

Duke konstatuar se të gjitha iniciativat ligjore për zgjidhjen e kësaj çështje janë bllokuar para Parlamentit të Bosnje Hercegovinës Inzko thekson:

“Për arsyet e sipërpërmendura, Përfaqësuesi i lartë merr vendimin mbi Ligjin dhe plotësimin e Kodit Penal të Bosnje Hercegovinës.”

Pas këtij vendimi të Inzkos, ka reaguar ashpër si Republika Srpska ashtu dhe Serbia e cila Milorad Dodik ka nxituar të dal në një konferencë për shtyp në Banja Llukë:

“Serbët nuk do ta pranojnë kurrë këtë vendim. Kjo është gozhda e fundit në arkivolin e Bosnje Hercegovinës dhe BeH nuk mund të funksionoj pas këtij vendimi,” tha Dodik duke shtuar se nuk ka dialog në BeH.

“Gjenocidi nuk ka ndodhur,” tha Dodik duke shtuar se Republika Srpska duhet të përgjigjet në mënyrë institucionale dhe se javën e ardhshme do të mbahet seanca e Parlamentit të Republika Srpskas ndërsa përfundoi:

“I bëjë thirrje partive politike në Republikën Srpska që të veprojmë të bashkuar sepse kjo është çështje e Republikës Srpska dhe popullit serb.”