Në 110-vjetorin e themelimit, Kurti: Vatra i dha shqiptarëve vrullin për liri, deri në pavarësi

Vatra juaj, Vatra jonë, i dhanë shqiptarëve vrullin dhe organizimin për liri, deri në pavarësi, tha Kryeministri i Kosovës në New York, në 110-vjetorin e themelimit të Pan Federatës Shqiptare “Vatra”, ndërsa përshëndeti anëtarësinë e shoqatës më të vjetër shqiptare në Shtetet e Bashkuara.

“Tani e 110 vjet Vatra juaj, Vatra jonë, e paraprirë nga ‘Dielli’ e ‘Kombi’ i dhanë shqiptarëve këtu e veçanërisht në trevat e tyre vrullin dhe organizimin për liri, deri në pavarësi,” tha Albin në fillim të fjalës së tij duke shtuar se shoqata “Vatra” në 10–15 vitet e para të krijimit të shtetit shqiptar e shpëtoi, e ndërtoi dhe e anëtarësoi shtetin e ri të kërcënuar ngado, mes kombeve si të barabartë dhe ia siguroi mbështetjen më të lartë ndonjëherë deri në atë kohë, për të drejtën për vetëvendosje popullit shqiptar.

“Vatra e miqësoi përjetësisht shqiptarinë me Amerikën dhe e vendosi në nivelin më të lartë cilësinë e kësaj marrëdhënie falë dijes, patriotizmit ekselent, ndershmërisë dhe këmbënguljes së pathyeshme përballë drejtuesve politikë e përfaqësuesve diplomatikë,” tha Kryeministri i Kosovës duke vlerësuar rolin e organizatave shqiptare si të pazëvendësueshëm, për të ruajtur dhe fuqizuar identitetin shqiptar në kushtet e sotme të globalizimit dhe të lëvizjes së madhe të njerëzve.

Në fund, duke theksuar se organizatat e diasporës shqiptare duhet të vijojnë lobimin pranë shteteve demokratike për respektimin e të drejtave të shqiptarëve kudo, Kryeministri i Kosovës, Albin Kurti i ka uruar “Vatrës” 110-vjetorin e themelimit, duke i dëshiruar jetë të gjatë sa të jetë kombi ynë.