Në 45 vjetorin e pushkatimit, Berisha: Askush se paraqiti diktaturën si Vilson Blloshmi e Genc Leka

Askush gjer sot nuk e ka paraqitur Shqipërinë e diktaturës siç ka bërë Vilson Blloshmi tek “Saharaja” e tij, apo “Kohën” Genc Leka në poezitë e tij, tha Kryetari i PD, Sali Berisha, në 45-vjetorin e pushkatimit të poetëve Vilson Blloshmi dhe Genc Leka, pasi mori pjesë në ekspozitën kushtuar jetës dhe veprës së tyre në Institutin për Studimin e Krimeve dhe Pasojave të Komunizmit.

“Erdha të shpreh nderimin tim më të thellë për sakrificën dhe veprën e pavdekshme të dy poetëve të rinj, vëllezër siamezë në idealet e tyre të lirisë, gjeni në krijimet e tyre letrare. Genc Leka dhe Vilson Blloshmi kanë lënë një trashëgimi do të thosha nga më të shkëlqyerat në letërsinë tonë, në poezinë tonë, si në rrafshin artistik, ashtu edhe në domethënien e kohës në të cilën janë shkruajtur.

Askush gjer sot nuk ka paraqitur Shqipërinë e diktaturës siç ka bërë Vilson Blloshmi tek ‘Saharaja’ e tij, apo ‘Kohën’ Genc Leka në poezitë e tij. Ato janë një tufë krijimesh jo voluminoze, por ato janë në kuptimin më të vërtetë të fjalës, diamante në letrat tona. Poezitë e tyre mund t’i krahasosh me krijimet më të bukura në letërsinë tonë, përvçse ato kanë brenda kurajon, guximin e jashtëzakonshëm të të dy të rinjve të cilën i thonë në sy diktaturës se çfarë ishte ajo,” tha Sali Berisha duke shpreh nderimin më të madh për jetën dhe veprën e këtyre dy poetëve ndërsa ftoj shqiptarët të lexojnë poezitë e tyre sepse ato janë veprat në të cilën stigmatizohet me vërtetësinë dhe forcën më të madhe diktatura komuniste, duke përfunduar:

“Me atë forcë që Migjeni ka stigmatizuar mjerimin dhe varfërinë e kohës, me atë forcë Vilson Blloshmi dhe Genc Leka përshkruajnë Shqipërinë, kohën e saj në diktaturë, në çdo aspekt. Ndaj dhe njëherë le të shprehim nderimin tonë më të thellë për këta dy gjeni të letrave shqipe!”