“Në industrinë e shërbimit të mikpritjes, forca më e madhe është stafi i kualifikuar”

Flet Mirjana Kuka, aksionere e “RHG”, që administron zinxhirin e markave të restoranteve, si: “Lift”, “Salt” dhe “OPA-Greek Street Food”, sfidat e përfshirjes në industrinë e mikpritjes në vitin 1995 dhe më pas, si kaloi nga biznes modest familjar, në një model sipërmarrjeje të shërbimit bashkëkohor, me ngritjen e një rrjeti restorantesh me markë prestigjioze.

E përfshirë që në vitin 1995 në industrinë e mikpritjes, fillimisht në sipërmarrjen e parë private të sektorit të hotelerisë, në hotelin “Diplomat”, i themeluar nga babai i saj, Mirjana Kuka gjatë këtyre tri dekadave ka vijuar e palodhur punën, në krijimin e modelit bashkëkohor të drejtimit të biznesit të industrive të shërbimit dhe mikpritjes.

E diplomuar për ekonomik, Mirjana Kuka sot është CEO e shoqërisë “Diplomat HY sh.p.k.”, me aktivitet në industrinë e mikpritjes.

Gjithashtu, aksionere e kompanisë “RHG”, e cila operon po në industrinë e mikpritjes me zinxhirin e markave të restoranteve, si: “Lift”, “Salt” dhe “OPA-Greek Street Food”, ajo ndihet me fat që iu dha mundësia të punojë në profesionin që dashuron.

“Njësia e parë akomoduese në sektorin e hotelerisë, hotel ‘Diplomat’, filloi si nismë e babait tim në vitin 1995, në të cilën u përfshiva me përfundimin e studimeve të larta. Ishte një biznes familjar dhe vërtet, ndihem me fat dhe falënderoj Zotin, që m’u krijua mundësia të punoj në këtë industri, pasi e dashuroj këtë profesion”, pohon znj. Kuka për podcast-in “Monitor Business Plus”.

Nga hoteleria, shoqëria u zgjerua me marka restorantesh të tipologjisë bashkëkohore, si: “Salt”, “Lift” dhe “OPA-Greek Street Food”, për të gjitha moshat, duke nisur nga 10 deri në 70 vjeç.

Në vitet 2014-2015, Mirjana Kuka tregon se nisi të ndiente frymën e konkurrencës, për shkak të evoluimit të modeleve të të bërit biznes në çdo sektor të ekonomisë.

Kjo periudhë përkoi edhe me përfundimin e studimeve jashtë Shqipërisë të dy djemve të saj, të cilëve iu kërkoi mbështetjen për të çuar përpara modelin bashkëkohor të biznesit të shërbimit në industrinë e mikpritjes.

“Kur ne nisëm aktivitetin me hotelin ‘Diplomat’ nuk kishim konkurrent tjetër në sektorin e akomodimit.

Më pas filluan të ngriheshin struktura të tjera, si hotel ‘Rogner’ në vitin 1996 me pronarë të huaj. Më tej, edhe në vitin 2015, gjërat filluan të ndryshonin edhe për shumë sektorë të tjerë të ekonomisë, përfshirë edhe industrinë e mikpritjes.

Po e ndieja shumë rrezikun e konkurrencës dhe për këtë arsye, iu kërkova fëmijëve të përfshihen në aktivitet, që përkoi më pas me ngritjen e shoqërisë RHG, që nga emri nënkupton revolucion në këtë industri”, thotë ajo.

Përfshirja në biznes e djemve të saj erdhi nga pasioni dhe dëshira, por me kushtin që të kishin vendimmarrje në drejtimin e kompanisë. Prej vitit 2015, shoqëria RHG, e cila operon po në industrinë e mikpritjes, me marka restorantesh në zë, drejtohet prej dy djemve të saj, Fabianit dhe Gerit.

“Në vitet 2015-2016, pasi djemtë përfunduan studimet jashtë – djali i madh, Fabiani, studioi në degën e Financë-Biznes në SHBA dhe Geri në Holandë – iu kërkova mbështetjen për të vazhduar përpara, kur tashmë në ato vite, sektorë të ndryshëm të ekonomisë po hynin në një fazë tjetër të të bërit biznes.

Dhe ndihem me fat që pasioni im për shërbimin e mikpritjes, fatmirësisht u përqafua edhe nga djemtë e mi, Fabiani dhe Geri.

Dëshira e tyre për ta dashur këtë profesion ka nisur që me angazhimet e para në bizneset tona, me kryerjen e detyrave si kamerier apo recepsionist, gjatë periudhës së ndjekjes së shkollës së mesme dhe studimeve të larta”.

Restoranti “Salt” u krijua në muajin maj 2016. Më vonë, gjatë pandemisë së Covid-19, u hap restoranti “Lift” dhe “OPA-Greek Street Food”.

Znj. Kuka thotë se synohet shtrirje e gjerë e rrjetit të këtyre markave të restoranteve në të gjithë Shqipërinë, pas shumë pikave të hapura në Tiranë. Brandi i restoranteve “Salt” është hapur edhe në Prishtinë dhe Palasë dhe do të hapet edhe në Shkodër.

Ata kanë vendosur të përqendrohen në segmentin e shërbimit ushqimor, duke shitur rrjetin e hoteleve “Diplomat”.

“Sfidat janë të forta, me qëllimin e mirë që të rrisim sa më shumë punësimin dhe të konsolidojmë këtë industri brenda kompanisë sonë në modelin më të mirë dhe më bashkëkohor të shërbimit në sektorin e mikpritjes”, thotë ajo.

Mirjana Kuka pohon se ëndrra e fëmijëve të saj për të zhvilluar këtë model biznesi është realizuar.

Por, pavarësisht se dy vëllezërit kompensojnë njëri-tjetrin në drejtimin e restoranteve, ku Geri, administratori, merret me menaxhimin, dhe Fabiani me financat e biznesit, znj. Mirjana Kuka thotë se fuqia më e madhe e kësaj sipërmarrje është stafi prej 250 të punësuarish.

“Stafi i punonjësve është forca më e madhe. Ata janë gjithçka për ne. Merita e çdo biznesi, nëse është i suksesshëm në treg, është sepse zgjedh staf të kualifikuar.

Ne zgjedhim staf të kualifikuar që trajnohen periodikisht, si brenda kompanisë dhe jashtë saj, sipas pozicioneve të punës”, nënvizon ajo.

Për zonjën Kuka, ishte tepër e vështirë për një grua që të bënte biznes në Shqipërinë e viteve 1993-1994 apo 1995.

Edhe sot, sipas saj, konkurrenca është e fortë, në egërsinë e ambientit të bizneseve të mëdha dhe taksave, grave të reja që duan të avancojnë në sipërmarrje, domosdoshmërisht ju duhet të sjellin risi.

Për znj. Kuka, të rinjve sot iu mungon modeli bashkëkohor, dhe shumë prej tyre hezitojnë t’u përfshihen në biznes./Monitor/