Ne ishim në Bruksel për të ardhmen, Kurti: Serbia hartonte plane ushtarake për aneksimin e Kosovës

Unë kam qenë në tavolinën e Brukselit duke folur për të ardhmen, ndërkaq Serbia po punonte për plane ushtarake për aneksimin e Kosovës, tha Kryeministri Albin duke konstatuar pas sulmit terrorist serb të 24 shtatorit, ndërsa renditi të arriturat e zbatimit të vendimeve të Samitit të Berlinit në tryezën “Procesi i Berlinit: Arritjet e deritanishme, pritjet nga Samiti i ardhshëm dhe përfitimet e mundshme nga Iniciativa e Përbashkët e Tregut Rajonal,” e cila u organizua në Prishtinë.

“Pas sulmit terrorist të Serbisë ndaj Kosovës por edhe marrëdhënies së tyre të hapur dhe bashkëpunimit të tyre me Rusinë. Unë kam qenë në tavolinën e Brukselit duke folur për marrëveshjet për të ardhmen, ndërkaq Serbia po punonte për plane ushtarake për aneksimin e vendit tonë. Kjo tregon se fqinji ynë s’është e interesuar për integrim në BE, por për qëllime hegjemonike.

Është me rëndësi pas sulmit mos të vazhdojmë thuajse asgjë s’ka ndodhur, por të gjithë autorët duhet të dënohen për pjesëmarrjen në këtë sulm terrorist që erdhi nga kufiri verior në Republikën e Kosovës,” tha Albin Kurti i prerë se qytetarët e Kosovës nuk duhet të mbahen peng, por ata të cilët nuk kanë qëllime të tilla.

Kryeministri i Kosovës tha se pret që siguria për Kosovën e sulmuar dhe ndëshkimi për sulmuesit të jenë çështjet të cilat do të diskutohen sot në Parlamentin Evropian.

“Presim që të ndodh ndëshkimi për sulmuesit, në këtë rast Serbisë që e mbështeti ushtarakisht, financiarisht, politikisht, zyrtarisht atë që ndodhi në Banjskë të Zveçanit. Por në të njëjtën kohë edhe ekstradimi i të gjithë atyre që po ndjeken sepse ikën nga vendi i krimit.

Më lejoni të përkujtoj se me datën 26 qershor në Kuvendin e  Kosovës ne i kemi shpallur dy organizata terroriste, ‘Mbrojtjen civile’ dhe ‘Brigadën veriore’, të cilat kanë vepruar dhe veprojnë në territorin e Republikës së Kosovës në mënyrë ilegale,” tha Kurti.

Kurti: Nga 2024 Kosova lëviz lirshëm në BE

Me këtë rast, Kryeministri Kurti tha se Kosova ka zbatuar marrëveshjen e mobilitetit, e cila përfshin lirinë e lëvizjes me letërnjoftim në vendet e Ballkanit Perëndimor, njohjen e kualifikimit të arsimit të lartë dhe njohjen e kualifikimit për mjekët, stomatologët dhe arkitektët.

“Kosova ishte e para që ratifikoi tri marrëveshjet në Kuvend këtë shkurt duke treguar zotimin dhe përkushtimin tonë ndaj procesit. Që nga nëntori i vitit të kaluar, kemi hartuar udhëzime administrative, kemi emëruar përfaqësues në komisione të përbashkëta. 13 ditë deri në Samit duhet të vëmë re se jo të gjitha vendet i kanë ratifikuar marrëveshjet. Është keq që Bosnja Hercegovina është përcaktuar t’i ratifikojë 2 nga 3 pikat, duke përjashtuar lëvizjen e lirisë,” tha Kryeministri i Kosovës, Albin Kurti, duke përfunduar:

“Nga 1 janari 2024 Kosova do të lëviz lirshëm në BE, por ende është e pasigurt nëse Kosova dhe Bosne Hercegovina do të mund të lëvizin te njëra tjetra.”

Ndryshe, tryeza “Procesi i Berlinit: Arritjet e deritanishme, pritjet nga samiti i ardhshëm dhe përfitimet e mundshme nga Iniciativa e Përbashkët e Tregut Rajonal” u organizuar nga Instituti i Prishtinës për Studime Politike, PIPS, në bashkëpunim me HD – Qendra për Dialog Humanitar.