Papa sugjeron se Kisha Katolike mund t’i bekojë lidhjet mes personave të gjinisë së njëjtë

Papa Françesku ka sugjeruar se ai mund të jetë i hapur që ta bekojë lidhjen e personave të gjinisë së njëjtë në Kishën Katolike.

Duke iu përgjigjur një grupi kardinalësh, që e kanë pyetur për ta sqaruar këtë çështje, raporton RFE, Papa Françesku tha se çdo kërkesë për bekim, duhet të trajtohet me mirësi pastorale.

“Ne nuk mund të jemi gjyqtarë që vetëm mohojmë, kundërshtojmë dhe përjashtojmë,” tha ai.

Megjithatë, Papa ka thënë se Kisha ende e konsideron marrëdhënien mes personave të gjinisë së njëjtë si mëkat dhe ende nuk e njeh martesën mes këtyre personave.

Kjo ka qenë një prej shumë kërkesave që i janë drejtuar Papës në një takim me pjesëmarrës nga e gjitha bota, për të diskutuar të ardhmen e Kishës.

Në Kishën Katolike, bekimi është lutje që bën një zyrtar i kishës, i cili i lutet Zotit që ta shohë me mirësi atë person, apo personat që bekohen.

Peshkopët në disa shtete, përfshirë Belgjikën dhe Gjermaninë, raporton RFE, kanë nisur t’iu lejojnë priftërinjve që t’i bekojnë çiftet e personave me gjini të njëjtë, mirëpo pozicioni zyrtar i Kishës mbetet i paqartë.