Në OKB, Presidenti i Kroacisë bën thirrje për njohjen e Kosovës
Duke shprehur shqetësimin për ngjarjet e fundit në marrëdhëniet ndërmjet Kosovës dhe Serbisë, ndërsa bëri thirrje për shtensionimin e situatës, Presidenti i Koracisë, Zoran Milanoviç, i bëri thirrje Asamblesë së Përgjithshme të Kombeve të Bashkuara për njohjen universale të Kosovës, si anëtare e barabartë e bashkësisë ndërkombëtare.
“Bota në të cilën jetojmë kërkon përpjekje të përbashkëta, globale, të harmonizuara, si çelës i suksesit në zgjidhjen e krizave serioze globale,” tha Zoran Milanoviç në fjalimin e tij prej 20 minutave para Asamblesë së Përgjithshme të Kombeve të Bashkuara ku foli se si duhet të ruhet roli i OKB si qendër e bashkëpunimit global ndërsa shprehu besimin për përpjekjet që po bëhen për reformimin e Këshillit të Sigurimit si instrument kryesor që është për ruajtjen e paqes dhe sigurisë globale.
Pjesën më madhe të fjalës së tij në OKB ia kushtoi zhvillimit të qëndrueshëm dhe argumentave pse përpjekjet botërore deri më tani ishin të pamjaftueshme, foli dhe përkushtimin e shtetit kroat në luftën kundër gjuhës së urrejtjes, antisemitizmit si dhe përparimit të të drejtave të grave dhe mbrojtjes së pakicave, por, ndryshe nga Kryeministri i Shqipërisë, Edi Rama, Milanoviç i kushtoi vend të rëndësishëm në fjalën e tij, kujdesit për situatën në Bosnje Hercegovinë dhe Kosovë.
“Kroacia mbështet perspektivën evropiane të Bosnje Hercegovinës dhe përshëndet vendimin e Bashkimit Evropian për dhënien e statusit të vendit kandidat,” tha Milanoviç duke theksuar rëndësinë e reformës zgjedhore në mënyrë që të gjitha etnitë të përfaqësohen në nivelet shtetërore, thelbësore kjo për stabilitetin e ardhshëm të Bosnje Hercegovinës.
Duke shprehur shqetësimet për ngjarjet e fundit në marrëdhëniet mes Kosovës dhe Serbisë, Presidenti i Kroacisë bëri thirrje:
“Të shtensionohet situata, dhe të njihet universalisht Kosova si anëtare e barabartë e bashkësisë ndërkombëtare,” tha Presidenti i Kroacisë, Zoran Milanoviç, para Asamblesë së Përgjithshme të OKB, duke bërë thirrje për investim në parandalimin e konfliktit sepse shpaguhet shumë herë më shumë se sa investimi për ndërprerjen e konfliktit dhe rehabilitimin që duhet të pasojë.
