Në prag të zgjedhjeve, Qeveria në detyrë e Kosovës ndan nga 100 euro për katër kategori qytetarësh

Qeveria në detyrë e Kosovës ka miratuar Pakon për Përballje me Inflacionin 2.0, e cila parashikon mbështetje financiare të njëhershme prej 100 eurosh për pensionistët, fëmijët, punëtorët e sektorit privat dhe studentët aktivë.

Kryeministri në detyrë, Albin Kurti, tha se masa është hartuar për të ndihmuar qytetarët në përballimin e rritjes së kostos së jetesës dhe inflacionit.

“Qytetarët e Republikës duhet ta dinë dhe gjithmonë duhet të llogarisin se qeveria jonë nuk do t’i lërë kurrë vetëm, pavarësisht pengesave apo bllokadave që të tjerët mund t’i vendosin në rrugën tonë. Prandaj sot kam kënaqësinë t’ju njoftoj për Pakon për Përballje me Inflacionin 2.0, të cilën e kemi dizajnuar dhe do ta miratojmë sot,” tha Albin Kurti duke saktësuar se paketa përfshin mbështetje të njëhershme prej 100 eurosh për pensionistët, fëmijët, punonjësit e sektorit jopublik dhe studentët aktivë.

Edhe me këtë rast, Kryeministri në detyrë i Kosovës akuzoi opozitën për bllokimin e rishikimit të buxhetit në Parlament ndërsa përfundoi:

“Për ta jetësuar këtë zotim, muajin e kaluar e proceduam në Kuvend rishikimin e buxhetit, i cili do të siguronte fondet për zbatimin e pakos. Kur rishikimi i buxhetit u paraqit për votim me procedurë të përshpejtuar, blloku opozitar e bëri të vetmen gjë që di ta bëjë tash e sa kohë, pra bllokimin.”

Ndryshe, mjetet financiare për pensionistët dhe fëmijët do të ndahen javën e ardhshme, kurse punonjësit e sektorit privat do të duhen të aplikojnë për të përfituar më pas.

Ky vendim për mbështetje financiare prej 100 eurosh për pensionistët, fëmijët, punëtorët e sektorit privat dhe studentët aktivë, vjen 16 ditë para mbajtjes së zgjedhjeve të reja parlamentare.