Në pritje të armëpushimit, Ministria Mbrojtjes e Ukrainës: Kemi vrarë 5.300 ushtarë rus

Ndërsa delegacioni ukrainas ka arritur në një zonë në kufirin Ukrainë-Bjellorusi për bisedime me përfaqësues të Federatës Ruse, Presidenca e Ukrainës deklaron se bisedimet do të fokusohen në arritjen e një armëpushimi të menjëhershëm dhe tërheqjen e forcave ruse nga Ukraina.

Ndërkohë Ministria e Mbrojtjes e Ukrainës tha përmes një deklarate në rrjetin social Facebook se në katër ditët e para të luftimeve në Ukrainë, 5.300 trupa ruse janë vrarë ndërsa janë shkatërruar 191 tanke, 29 avionë luftarakë, 29 helikopterë dhe 816 transportues të blinduar të personelit.

Ministria e Mbrojtjes e Rusisë e ka pranuar dje se ushtria e saj ka pësuar humbje, por nuk dha asnjë shifër të saktë.

Ministria e Shëndetësisë e Ukrainës ndërkohë ka bërë të ditur se së paku 352 civilë, përfshirë 14 fëmijë, janë vrarë që nga fillimi i pushtimitdhe mbi 1,600 njerëz u raportuan të plagosur.

Ndryshe, në bisedimet që po zhvillohen në kufirin Ukrainë-Bjellorusi, raporton RFE, në delegacionin ukrainas janë ministri i Mbrojtjes, Oleksii Reznikov, dhe këshilltari presidencial, Mykhailo Podolyak ndërsa për delegacionin rus për moemntin nuk ka detaje.

Rusia ka filluar pushtimin e Ukrainës me 24 shkurt me sulme të ashpra nga toka dhe ajri, sulme që këto për momentin po u rezistojnë forcat ukrainase.