Në selinë e OKB-së në New York, hapet ekspozita për gjenocidin e Srebrenicës

Një ekspozitë për gjenocidin në Srebrenicë është hapur në selinë e Kombeve të Bashkuara, OKB, në New York.

Ekspozita përfshin artefakte, fotografi dhe video-dëshmi të të mbijetuarve, thekson Qendra Përkujtimore e Srebrenicës, raporton RFE.

“U investuan përpjekje dhe përkushtim i madh për ta bërë këtë ekspozitë realitet dhe ne jemi jashtëzakonisht krenarë për ekipin tonë që punoi pa u lodhur në këtë projekt,” shprehet Qendra Memoriale e Srebrenicës përmes rrjetit social X.

Në maj, Asambleja e Përgjithshme e Kombeve të Bashkuara miratoi Rezolutën që e shpall 11 korrikun Ditë Ndërkombëtare të Përkujtimit të Viktimave të Gjenocidit në Srebrenicë.

A unique exhibition of the Srebrenica Memorial Center has been opened at the @UN headquarters in New York.
This exhibition, which includes artifacts, photographs, and video testimonies of survivors, is extremely important for preserving the memory of the genocide victims and… pic.twitter.com/V0QLBtnowc

— Srebrenica Memorial Center (@SrebrenicaMC) July 2, 2024

Eshtrat e 14 viktimave të gjenocidit në Srebrenicë, i cili u krye në vitin 1995, janë gati për varrim në funeralin kolektiv më 11 korrik në Qendrën Përkujtimore të Potoçarit.

Viktima më e re që është varrosur është 17-vjeçari Beriz Mujiç, i cili u vra në korrik të vitit 1995 në Bratunac. Eshtrat e tij u zhvarrosën në maj të vitit 2023 në zonën e komunës së Srebrenicës.

Viktima më e vjetër që do të varroset në Potoçari më 11 korrik është 68-vjeçari Hamed Saliç. Eshtrat e tij u zhvarrosën në Zhepa në maj të vitit 2014.

Në Qendrën Përkujtimore në Tuzlla gjenden eshtrat e 11 viktimave të gjenocidit, të identifikuar deri më tani, por familjet ende nuk kanë dhënë pëlqimin për varrimin e tyre, kryesisht për shkak të paplotësimit të trupave të këtyre viktimave.

Deri më tani në Qendrën Memoriale të Potoçarit janë varrosur 6.752 viktima të gjenocidit.

Gjykata Ndërkombëtare e Drejtësisë në Hagë e karakterizoi krimin në Srebrenicë si gjenocid në vitin 2007.

Forcat serbe, raporton RFE, në këtë rajon lindor të Bosnje Hercegovinës vranë mbi 8.000 burra dhe djem boshnjakë në korrik të vitit 1995. Për gjenocidin e kryer, deri më tash, u dënuan më shumë se 50 persona me rreth 700 vjet burg.

Në mesin e tyre janë edhe presidenti i kohës së luftës i Republikës Srpska, Radovan Karaxhiç, dhe Komandanti i Përgjithshëm i Ushtrisë së atëhershme serbe, Ratko Mladiç.