Në SHBA mbi 20 mijë të vdekur nga koronavirusi, Rusia me paradë feston 9 Majin

Mbi 1.300 pacientë e kanë humbur betejën me koronavirus në SHBA gjatë 24 orëve të fundit, që është dhe numri  më i madh i të vdekurve në një ditë që nga fillimi i epidemisë në Shtetet e Bashkuara.

Të prekur janë mbi 500 mijë ndërsa numri i të vdekurve ka kaluar mbi 20 mijë duke kaluar dhe vendi i parë në botë me numrin e jetëve të humbura nga COVID-19.

“Sa i përket numrit të vdekurve kjo është një javë e keqe,” tha infektologu kryesor në SHBA, Anthony Fauci ndërsa shton. “Në momentin kur shohim rritjen e numrit të vdekurve po përballemi me një rënie dramatike të numrit të njerëzve të shtruar në spital.”

Në Itali është shënuar rënia e numrit të vdekurve dhe të infektuarve me COVID-19, numri i të shëruarve është në rritje ndërkohë numri i pacientëve në kujdes intensiv është në rënie. Gjatë 24 orëve të fundit janë shënuar 619 vdekje nga koronavirusi duke e çuar në 19.468 numrin e të vdekurve nga COVID-19.

Sipas të dhënave zyrtare, në Suedi e cila ka vendosur për një trajtim më të butë të luftës kundër koronavirusit, janë mbi 10 mijë të infektuar me një vdekshmëri shumë të madhe. Në këtë vend me 10.3 milionë banorë, 887 persona kanë vdekur nga koronavirusi ndërsa të dhënat e Universitetit John Hopkins.

Stambolli, qytet me 16 milionë banorë do të jetë në karantinë së bashku me 30 qytete tjera në Turqi për 48 orë.

Në Britaninë e Madhe gjatë 24 orëve betejën me COVID-19 e kanë humbur 917 të infektuar duke e çuar në 9.875 numrin e të vdekurve me koronavirus. Mosha e tyre ishte prej 11 deri në 102 vjeç ndërsa 33 prej tyre nuk kishin kurrfarë shqetësime shëndetësore. Ndërkohë gjendja e Kryeministrit Johnson është në përmirësim e sipër.

Në Skoci gjatë 24 orëve të fundit kanë vdekur 47 njerëz dhe aktualisht janë 542. 202 të infektuar në kujdes intensiv.

Në Irlandën Veriore gjatë 24 orëve të fundit betejën me COVID-19 e kanë humbur 15 të infektuar duke e çuar në 107 numrin e të vdekurve.

Dy të vdekur dhe 49 të infektuar është bilanci nga koronavirusi në 24 orët e fundit në Maqedoninë e Veriut. Ministri i Shëndetësisë, Venko Filipçe, ka bërë të ditur se

janë regjistruar edhe 49 raste të reja duke e çuar numrin e të prekurve në 760 ndërsa numri i të vdekurve ka shkuar në 34. Gjatë 24 orëve të fundit janë realizuar 586 teste, ndërsa numri i përgjithshëm i kontrolleve ka arritur në mbi 7.600.

Në Serbi gjatë 24 orëve të fundit kanë vdekur 3 njerëz ndërsa janë zbuluar edhe 274 të prekur duke e çuar në 3.380  numrin e të prekurve me koronavirus ndërsa 74 kanë humbur betejën me COVID-19.

Drejtori i Klinikës Infektive në Lublanë e cila pranon të prekurit me COVID-19, Alezh Rozman, tha sot se Sllovenisë i duhen disa vite për të krijuar imunitetin kolektiv ndaj koronavirusit. Sa i përket plazhit jashtë shtetit, Rozman ishte i prerë se gjatë këtij viti ai nuk do të jetë i mundur ndërsa në plazhet sllovene kjo varet nga masat e lëvizjes që do të miratoj qeveria.   

Kancelari austriak, Sebastian Kurz, sërish i bëri thirrje qytetarëve për distancë social dhe të shmangin tubimet familjare për Pashkët në mënyrë që të ruhen rezultate e shënuara në luftën kundër koronavirusit. Aktualisht në Austri janë evidentuar 13.561 të infektuar ndërkohë dje ishin 13.500. Prej tyre 337 kanë vdekur, 6604 janë shëruar ndërsa janë kryer 150 mijë teste.

Pas festës së Pashkëve, qeveria austriake kanë paralajmëruar hapjen e dyqaneve deri në 400 metra/katror ndërsa regjimi i lëvizjes, tubime, distanca sociale dhe bartja e maskave në dyqane dhe transport publik, janë masa që janë në fuqi deri më 1 Maj.

Kryeministri i Japonisë, Shinzo Abe, i ka bërë thirrje qytetarëve që të përmbahen nga daljet e mbrëmjes pasi është rritur numri i të infektuarve. Abe bëri thirrje që të mos dalin në pubet e natës dhe bare dhe të kenë kujdes distancës sociale.

75 vjet pas çlirimit, në kampin famëkeq nazist Buchenëald, për herë të parë nuk u përkujtuan viktimat për shkak të pandemisë COVID-19, ndonëse ngushëllon fakti se u nderuan në mënyrë virtuale.

Rreth 1.7 milionë në gjithë botë janë të prekur me koronavirus ndërsa sipas të dhënave të Worldometer betejën e kanë humbur 107.637 njerëz.

Përfundimisht, lideri më i çmendur vazhdon të jetë ai i Rusisë, Vladimir Putin, i cili deri sa bota digjet nga koronavirusi ai krihet. Më 9 Maj,  Moska zyrtare ka vendosur të mbajë paradën ushtarake për 75 vjetorin e Ditës së fitores ndaj fashizmit, ka bërë të ditur për Agjencinë e lajmeve Tass, zëdhënësi i Kremlinit, Dmitrij Peskov.