Në veri serbët vazhdojnë protestat, në Moldavi liderët e BE diskutojnë për Kosovën
Serbët në veri të Kosovës vazhduan protestën e tyre për të pestën ditë më radhë në Zveçan, Zubin Potok dhe Leposaviç.
Orët e para të mëngjesit filluan të grumbullohen punëtorët e administratës serbe që financohet nga Beogradi, ku siç thonë vetë ata po shkojnë në punë.
Aktualisht objektet e komunave ruhen nga Policia e Kosovës ndërsa në Zveçan janë parë forca të shtuara të KFOR-it në gjithë komunën duke filluar nga rrugët hyrëse.
Ndërsa Policia e Kosovës ka reaguar pas postimeve në disa media sociale, nga persona dhe profile të ndryshme, ku i bëhet thirrje qytetarëve shqiptarë për pjesëmarrje në një protestë sot në ora 12:00, në Jug të Mitrovicës, me synim për marshim në Veri.
“Dëshirojmë të sqarojmë se, pas vlerësimeve nga institucionet e sigurisë është vërtetuar se shumë nga këto profile janë të dyshimta dhe se postimet mund të jenë qëllimkëqija, në dëm të vet qytetarëve dhe interesave të Republikës së Kosovës,” thekson Policia e Kosovës përmes një njoftimi duke ftuar qytetarët për qetësi dhe të mos bien pre e asnjë gjoja organizimi nga persona të panjohur, por të lënë institucionet e sigurisë, institucionet e Republikës së Kosovës të trajtojnë situatën me profesionalizëm.
Ndërkohë sot udhëheqësit e 27 vendeve të Bashkimit Evropian dhe 20 vendeve të tjera evropiane mblidhen sot në Samitin e dytë të Komunitetit Politik Evropian, EPC, në Chishinau të Moldavisë, ku Kosovën e përfaqëson Presidentja Vjosa Osmani.
Komuniteti Politik Evropian sot pritet të diskutoj disa çështje, mes të cilave edhe tensionet në veri të Kosovës, raporton Agjencia e lajmeve Reuters, ndërsa pritet dhe takimi i Presidentit të Francës, Emanuel Macron dhe kancelarit të Gjermanisë, Olaf Scholz, me Presidenten e Kosovës, Vjosa Osmani.
Ndryshe, dje në Konferencën “Globsec” në Bratislavë, Presidenti Macron ka bërë të ditur se bashkë me Kancelarin Scholz sot do të bisedojnë në Chishinau me Presidenten e Kosovës, Vjosa Osmani, dhe Presidentin e Serbisë, Aleksandar Vuçiç. Macron.
Ndërsa shefi i politikës së jashtme të BE-së, Josep Borrell, pas takimit në Bratislavë Kryeministrin e Kosovës, Albin Kurti, paralajmëroj për sot një takim në Kishinau me Presidentin e Serbisë, Aleksandar Vuçiç.
Komuniteti Politik Evropian, EPC, është platformë për koordinim politik e krijuar mbi bazën e propozimit të presidentit francez, Emmanuel Macron, e cila synon nxitjen e dialogut dhe bashkëpunimit për çështje me interes të përbashkët, forcimin e sigurisë, stabilitetit dhe prosperitetit në kontinentin evropian.
