Negociatat nuk u çelën, Edi Rama nga Shkupi: Dështoi BE, jo NE!
Pasi Këshilli i BE për Çështjet e Përgjithshme vendosi të mos çel negociatat me Shqipërinë dhe Maqedoninë e Veriut, dhe Komisioneri për Zgjerimin dhe Fqinjësinë, Olivér Várhelyi, tha se puna do të vijojë në Presidencën sllovene të BE për të përmbyllur edhe këtë çështje, që ai e konsideron prioritare, Kryeministri Edi Rama nga Forumi Ekonomik i Maqedonisë së Veriut që po zhvillohet në Shkup, foli ndryshe, pa prioritete, pa vijimësi por duke akuzuar ashtu siç akuzon Dritan Lelin në Vlorë. Shqipëria dhe Maqedonia e Veriut nuk dështuan, tha Edi Rama, por ajo që dështoi ishte vetë BE.
“Nuk është hera e parë që dështojnë në mosdhënies e mundësisë për Konferencën e Parë. Është pak a shumë si një çështje martese, ku gjithçka e ke bërë në rregull, dhe në fund nusja nuk paraqitet. Ne do vazhdojmë të ecim përpara, të bëjmë punën tonë. Ne ishim gati edhe më parë. Fakti që disa vende më parë deklaronin që Shqipëria nuk është gati, kjo nuk do të thotë që Shqipëria nuk ishte gati vërtet, por kjo lidhet me çështjet e brendshme. Pra, nuk ishim gati, kur Holanda kishte çështjen e zgjedhjeve. Unë jam i shqetësuar sa ne bëjmë progres, jo për këtë. Ne nuk po e bëjmë këtë, pasi disa burra shteti në Bruksel na thonë se duhet të ecim përpara. Nuk jam aspak pesimist, edhe pse ata mund të dështojnë disa herë,” tha Rama tashmë i bindur edhe vetë se Shqipëria kishte plotësuar kushtet ndonëse 3 milion shqiptarë jetojnë në një shtet mizerabël të qeverisur nga qeveria socialiste e Edi Ramës.
Dhe jo vetëm kaq! Edi Rama shkon edh emë larg duke e pranuar se ai nuk e beson këtë BE dhe liderët e saj por janë qytetarët e Shqipërisë që i besojnë këta zyrtarë evropianë, dhe mendojnë se është politika e brendshme problem.
“Ne jemi partner i rëndësishëm ekonomik me Maqedoninë e Veriut. Ne nuk kemi dështuar, ata kanë dështuar. Është shtëpia e tyre, ne duam të hyjmë në këtë shtëpi, ndaj dhe nuk vendosim ne. Ne jemi në Evropë, jemi të rrethuar nga kufij evropianë. E vetmja keqardhje që kam është se do ishte më mirë të na thonin se ‘ju duam brenda familjes, por janë disa rregulla, që nuk janë ende gati’, pasi krijohet një situatë pak e çuditshme, pasi qytetarët në Shqipëri i besojnë këta zyrtarë evropianë, dhe mendojnë se është politika e brendshme problem.”
