Nënvlerësimi i studentit shqiptar!

nga Klarisa Rexhvelaj

Sekreti i arsimimit qëndron në respektimin e studentit – Ralph Waldo Emerson

Në mbarë botën shoqëritë demokratike përqëndrojnë energjinë e tyre në edukimin e brezave të rinj, por fatkeqesisht shteti ynë nuk po funksionon si gjithë bota.

Energjia e qeverisë shpenzohet e tëra në propagandë, në urdhra e dëshira delirante se si të mbrohemi nga Covid-i, e përsa i përket studentëve janë të nënvlerësuar, të shtypur deri në fund.

Sot përballemi me situatën e pandemisë globale, ku bota mbarë ka gjetur si zgjidhje “Mësimin Online”, por a jemi gati ne për modernizma të tilla?!

A mund të kërkojnë nga ne të përdorim platforma të tilla, të cilat shumë mirë mund të jenë inovacion i së ardhmes, por përball nuk kemi studentin nga BE, as Amerika apo nga vendet Skandinave.

Përball keni studentin shqipëtar që deri dje protestonte për bankat e shkollës, për ngrohjen, për pamundësinë ekonomike që e limitojnë në çdo aspekt të jetës.

Shumica nga ne kanë një smart-phone, por a kemi mundësi të kemi një ofertë me internet çdo muaj?

Nuk po flasim për fëmijët e kryeqytetit,por për ata nga maja e Vermoshit e deri në Konispol, e Ministria e Arsimit supozohet të mendojë për të gjithë.

Po vetë pedagogët dhe mësuesit, a janë paraprakisht të trajnuar për këtë situatë, pasi deri dje i urdhëronin të mos perdornin celularin gjatë orarit të punës e sot ky celular u kthye në mjetin më të rëndësishëm për të siguruar bukën e përditshme.

Arsimi është metodë bazë e përparimit dhe e reformimit social, por si duket dikush ka në plan të na lërë qellimisht në errësirë, e ka frikë reformimin social, e ka alergji përparimin.

Buxheti i shpenzuar në edukim sa vjen e zerohet dhe auditori çvleresohet gjithmonë e më shumë.

Mbështetja financiare ndaj studentëve është 0, mbështetja financiare ndaj institucioneve të arsimit për të pasur infrastrukturë është 0, kerkimi shkencor është 0, vetëm 00000!

Ka ardhur koha ta kapim të keqen nga koka jo nga bishti, të kërkojmë një reformim total të sistemit arsimor, e pse jo të të gjithë mënyrës qeverisëse.

E keqja më e madhe që na bëhet është ai “Ligji për arsimin e Lartë” për të cilin as nuk na pyetën as paralajmëruan për efektet.

Por studentët një herë e paralajmëruan qeverinë, me sa duket akoma se kanë të qartë se çfarë ndodh kur do t’i zësh frymën shtresës më vitale të shoqërisë.

Si duket kanë nevojë për rikujtesë!