Nesër Komisioni për Reformën Zgjedhore, PD: Ilegjitim!
Komisoni për Reformën Zgjedhore me bashkëkryetarët, Damian Gjiknuri dhe Rudina Hajdari, që pritet të zhvilloj nesër takimin e radhës, për Partinë Demokratike nuk është legjitim.
Sekretari i Përgjitshëm i Partisë Demokratike, Gazment Bardhi, tha se opozita e bashkuar është e gatshme të kontribuojë për reformën zgjedhore në mënyrë transparente dhe gjithpërfshirëse, por ky Komision nuk i garanton këto.
“PD dhe opozita i mbetet qëndrimit publik, të shpallur në tryezën e organizuar nga OSBE. Ne jemi të gatshëm të kontribuojmë për reformën zgjedhore në një mënyrë transparente, gjithpërfshirëse dhe barazi të plotë me palën tjetër. Këto nuk i garanton komisioni, jo-legjitim i reformës zgjedhore,” tha Gazment Bardhi.
Kështu, opozita, thellësisht e angazhuar me Reformën Zgjedhore, nesër në orën 9:30, do të mbledh Grupin e punës së Opozitës së Bashkuar për Reformën Zgjedhore.
Ndryshe, në Konferencën e nivelit të lartë që u zhvillua më 25 Shtator, me temë “Të mohuar nga sistemi: ndërtimi i një sistemi gjithëpërfshirës për të mbrojtur demokracinë”, e cila u organizua nga Komisioni i Posaçëm Parlamentar për Reformën Zgjedhore që kryesohet nga Damian Gjiknuri dhe Rudina Hajdari ndërsa është ndihmuar nga Prezenca e OSBE-së, Përfaqësuesi i opozitës në Konferencë, Ivi Kaso, tha se opozita nuk e njeh legjitimitetin e Komisionit Parlamentar për Reformën Zgjedhore. Duke e cilësuar si një organ që nuk përfaqsëon vullnetin e qytetarëve, pasi ka dalë nga zgjedhjet e blera me krimin në 20017-ën, qendrimi i opozitës për mosnjohjen e këtij komisioni ëhstë i qartë:
“Asnjë Komision që ka në përbërje dhe drejtim individë që duhet të ishin në burg për krime elektorale, nuk gëzon legjitimitetin për realizimin e Reformës Zgjedhore. Asnjë Komision që ka në përbërje dhe drejtim individë që nuk përfaqësojnë opozitën, nuk mund të përcaktojë rregullat për pjesëmarrje në zgjedhje të partive politike opozitare,” theksoi Ivi Kaso duke cituar qendrimin zyrtar të opozitës për reformën zgjedhore.
“Propozimi i opozitës për zgjidhjen e këtij problemi është ngritja e një grupi të posaçëm për reformën, që përfaqëson drejt elektoratin shqiptar, në përbërje të të cilit të ketë edhe përfaqssues të partnerëve kryesorë ndërkombëtarë. Opozita e Bashkuar propozon që procesi të drejtohet nga një strukturë e përbërë nga përfaqësues të organizmave ndërkombëtarë (OSBE/ODIHR, BE, SHBA, etj.), një përfaqësues i Parlamentit monopartiak dhe një përfaqësues i Opozitës së Bashkuar.. Produkti i dakordësuar nga kjo strukturë, pasi i nënshtrohet konsultimit me publikun, nëpërmjet formave dhe metodave që mundësojnë marrjen e mendimit të qytetarëve, miratohet pa ndryshime,” thuhet në qendrimin zyrtar të opozitës së bashkuar për reformën zgjedhore. Ky qendrim ka në përbërje 5 çështje kryesore që opozita i shikon si një rrugë e mirë për të zgjidhur problemin e refomës zgjedhore, një nga kushtet kryesore për nisjen e negociatave.
