Nesër votimi i qeverisë re, Zaev prezanton programin, opozita paralajmëron rrëzimin e tij!

Sot kandidati për Kryeministër të ri të Maqedonisë së Veriut, Zoran Zaev, prezantoi programin qeverisës ndërsa opozita i bëri të qartë se do ta rrëzoj me protesta.

Gjatë prezantimit të programit qeverisës, Zoran Zaev tha se një ndër prioritet e para të Qeverisë së re është lufta kundër koronavirusit dhe ekonomia. Ai paralajmëroi reforma në administratën publike duke shkurtuar 20 për qind të saj ndërsa shtoi se është parashikuar edhe vetingu në gjyqësor.

“Do të shqyrtojmë disa modele për reforma në administratë dhe shkurtimin për 20 për qind me riorganizim, pensionim dhe transferimin në sektorin privat. Gjykatësit për të cilët do të dëshmohet se qëllimisht dhe me vetëdije kanë vjetëruar çështjet, do të shkarkohen. Çështjet e Prokurorisë Speciale Publike patjetër të marrin epilog. Vendosim sistem të kontrollimit të pasurisë së gjithë funksionarëve,” tha Zaev duke e bërë të qartë se pas anëtarësimit të vendit në NATO, Qeveria e re do të fokusohet edhe në bisedimet me Bashkimin Europian.

“Qeveria e re është e përkushtuar në marrëveshjet e Prespës dhe atë me Bullgarinë, të cilat e bënë të mundur. Do të vazhdojmë të punojmë me përkushtim në marrëdhëniet e fqinjësisë së mirë. Do të vazhdojmë me Marrëveshjen e Ohrit, e cila është baza e bashkëjetesës ndëretnike. Përpara nesh është një periudhë në të cilën si shtet do të marrim shumë më tepër sesa do të japim. Ne jemi të përkushtuar të hapim 80 përqind të kapitujve të negociatave në katër vitet e ardhshme,” tha Kryetar i LSDM-së dhe kandidati për Kryeministër të ri, Zoran Zaev.

VMRO-DPMNE paralajëmroi protesta për rrëzimin e qeverisë

Pas prezantimit të programit qeverisës, deputeti i VMRO-DPMNE-së, Aleksandar Nikollovski, akuzoi koalicionin qeverisës si koalicion të mashtrimit dhe paralajëmroi protesta për rrëzimin e qeverisë, e cila sipas tij edhe ashtu ka një shumicë jo të qëndrueshme parlamentare.

“Do të shihemi nëpër qytetet dhe fshatrat e Maqedonisë sepse ky është koalicioni i mashtrimit, ky koalicion do të prishet në demonstratat masive nëpër qytetet dhe fshatrat e Maqedonisë që do të fillojnë këtë vjeshtë sepse kapacitet për ndërprerjen e polarizimit nuk ka, kapacitet për realizimin e premtimeve nuk ka kurse njëkohësisht populli ndjehet i zhgënjyer dhe nuk është i përfaqësuar denjësisht në këtë Qeveri,” tha Aleksandar Nikollovski nga VMRO-DPMNE.

I menjëhershëm ishte reagimi i Damjan Mançevski dhe Kostadin Kostadinovskit nga LSDM. Derisa Mançevski i përkujtoi kolegut opozitar për humbjet në kontinuitet të VMRO-DPMNE-së, Kostadinovski tha se Nikollovski thotë gjera të pavërteta,

“Koleg Nikollovski, mesa e di unë, protesta jeni duke paralajmëruar nga viti i kaluar, se do të dilni nëpër rrugë, se nëpër rrugë do të ketë popull, se do ta rrëzoni Qeverinë, asgjë nuk ndodhi. Mirë koleg Nikollovski, ishit bartës në NJZ4, me siguri keni vozitur nga Shtipi për në Strumicë, a nuk keni turp të gënjeni se nuk po ndërtohet gjë,” tha Kostadin Kostadinovski.

Ndërsa Damjan Mançevski renditi humbjet e VMRO-DPMNE-së:

“Rezultati final i zgjedhjeve është se kjo kryesi e VMRO DPMNE-së e përjetoi dështimin e tretë, tre zgjedhje me radhë po humbisni, presidencialet, lokalet dhe tani parlamentaret. Retorika juaj e tërë, fushata, politika ishte në bazë të nacionalizmit. Dua të flas për programin qeverisës të kandidatit për kryeministër ndryshe i njohur në 3.5 vitet e kaluara, si kryeministri që premtoi se Facebook dhe Google presin në kufi të investojnë në Maqedoni. Kaluan 4 vite, Facebook dhe Google ende presin në kufi, me siguri nuk kanë teste negative për koronën dhe nuk mund të hyjnë. Prandaj çdo premtim për përparim ekonomik dhe investime është një rrenë e madhe, siç ishte rrena për Facebook dhe Google, se do të investojnë në Maqedoni, kjo e deklaruar në shtator 2017.”

Në debat u përfshi edhe Antonio Milloshovski, duke theksuar përplasjet dhe akuzat e ndërsjella të LSDM-së dhe BDI-së gjatë fushatës parazgjedhore.

“Gjatë fushatës parazgjedhore, askush tjetër, por Z. Zoran Zaev dhe kryetari i lëvizjes BESA pohonin se BDI, perifrazoj, është parti e korruptuar kriminale që është kanceri i shoqërisë dhe që lufton vetëm për pushtet dhe para. Tani lind pyetja, në paraqitjen e Z.Zaev duhet të na sqarojë nesër Z. Artan Grubi, Bujar Osmani, Fatmir Besimi dhe të tjerët për të cilët nuk kam thënë unë, por Zoran Zaev, a do të luftojnë për pushtet, për para, a i konsideron edhe më tej të korruptuar dhe kancer i shoqërisë,” u shpreh Antonio Milloshovski i VMRO-DPMNE.

Seanca parlamentare për zgjedhjen e qeverisë, raporton AlSat, do të vazhdojë nesër në orën 12 ndërsa deputetët duhet të votojnë për qeverinë e re të Maqedonisë së Veriut deri në mesnatë.

Ndryshe, kabineti i ri qeveritar i Maqedonisë së Veriut do të përbëhet nga 19 ministra. Ministër për Sistem Politik u propozua – Artan Grubi, Ministre e Mbrojtjes – Radmilla Sheqerinska, Ministre e Arsimit dhe Shkencës – Milla Carovska, Ministër i Punëve të Jashtme – Bujar Osmani, Ministër i Financave – Famir Besimi, Ministër i Ekonomisë, Kreshnik Bekteshi, Ministër i Brendshëm – Oliver Spasovski, Ministër i Drejtësisë – Bojan Mariçiq, Ministër i Bujqësisë – Arijanit Hoxha, Ministër i Transportit – Bllagoj Boçvarski, Ministër i Shëndetësisë – Venko Filipçe, Ministre e Punës dhe Politikës Sociale – Jagoda Shahpanska, Ministër i Administratës – Jeton Shaqiri, Ministër i Ekologjisë – Naser Nuredini, Ministër i Pushtetit Lokal – Goran Mileski, Zv/kryeministër për Luftën kundër Korrupsionit – Lupço Nikolovski, Zv/kryeministër për Ekonomi – Fatmir Bytyqi, Zv/kryeministër për çështjet Evropiane – Nikolla Dimitrov, dhe Ministre e Kulturës Irena Stefoska. Pas formimit të qeverisë, Zaev paralajmëroi emërimin e Zv/ministrave.