Paralajmërimi, AAK: Zgjedhje, nëse Haradinaj nuk zgjidhet President!
Deputeti i AAK-së, Rasim Selmanaj ka paralajmëruar se Kosova mund të shkojë në zgjedhje nëse president nuk zgjidhet Ramush Haradinaj.
“Zgjedhja e Presidentit varet kryekëput nga deputetët e AAK-së ose vendin e dërgojnë në zgjedhje ata që e bllokojnë këtë propozim,” tha Rasim Selmanaj duke u përfshirë në debatin për presidentin përmes një postimi në rrjetin social Facebook duke e bërë të qartë se për këto zgjedhje vetëm Lëvizja Vetëvendosje dhe AAK kanë elektorat të konsoliduar.
Ja postimi i plotë:
Rreth Presidentit dhe debatit:
Ne e kemi presidentin e zgjedhur, pavarësisht mendimit personal, unë dhe, besoj, një pjesë dërmuese e popullit janë me të në raport me Gjykatën Speciale, pasi besojmë fuqishëm në luftën e pastër të popullit tonë në fund shekullin 20-të.
Jemi të vetëdijshëm se zgjedhja e Presidentit varet kryekëput nga deputetët e AAK-së ose vendin e dërgojnë në zgjedhje ata që e bllokojnë këtë propozim.
Shkuarja në zgjedhje i konvenon vetëm VV-së dhe AAK-së, të cilat edhe janë të konsoliduara edhe kanë substancën elektorale të ruajtur mirë.
Pra, pavarësisht zërave kundër, nominimi i Haradinajt për President dhe zgjedhja e tij do t’i forconte institucionet dhe do të krijonte kredibilitet të një figure unifikuese për tërë qytetarët e Kosovës.
