Neutralizohen vatrat serioze të zjarrit, Peleshi: Sfidë ngelet Karaburuni!

Më në fund ka reaguar, Ministri i Mbrojtjes, Niko Peleshi, për situatën e krijuar në disa qarqe me zjarre duke theksuar se të gjitha vatrat serioze të zjarreve janë neutralizuar dhe sfidë, sipas tij, ngelet Karaburuni. Por sot u shfaqën dhe vatra të reja zjarri.

“Gjatë natës dhe orëve të para të mëngjesit janë vënë në kontroll ose neutralizuar pothuaj të gjitha situatat serioze të zjarrit, sfidë vazhdon të ngelet Karaburuni, ku është përqendruar edhe puna më e madhe e Forcave të Armatosura.

Falenderoj të gjithë efektivët e Forcave të Armatosura dhe strukturave të tjera të mbrojtjes civile për angazhimin dhe sakrificën e treguar në këto ditë të nxehta, na bëni të gjithëve krenarë!”, thekson NikoPeleshi përmes rrjetit social.

Ndërkohë një vatër e fuqishme zjarri sot është aktivizuar në Mamurras duke rrezikuar edhe banesat.

Zjarri ka rënë në një zonë me pisha, afër lagjes “Demokracia” ku rrezikohen rreth 10 familje.

Deri tani, rreth 10 hektar pyll janë në flakë, dhe zjarri po përparon drejt banesave.

Në terren ishte vetëm një zjarrfikëse si dhe dy punonjës të këtij shërbimi dhe një makinë policie, por më pas edhe ata u larguan, duke lënë banorët në mëshirë të fatit për t’u përballur të vetëm me flakët.