New York, Presidentja Osmani takim me Gabriel Escobar

Dialogu Prishtinë- Beograd ishte temë e diskutimit të takimit që Pesidentja e Kosovës, Vjosa Osmani, zhvilloi me Të dërguarin amerikan për Ballkanin Perëndimor, Gabriel Escobar, dhe këshilltarin e Departamentit të Shtetit, Derek Chollet.

Takimi është zhvilluar në New Jork, ku po mbahet Asambleja e Përgjithshme e Kombeve të Bashkuara.

Në njoftimin e Presidencës së Kosovës, thuhet se Osmani theksoi nevojën për të ecur përpara me procesin e dialogut me Serbinë, të përqendruar në njohjen reciproke.

“Presidentja Osmani, potencoi nevojën që Serbia t’i zbatojë obligimet e saj nga marrëveshja për udhërrëfyesin e energjisë dhe nevojën urgjente që të arrihet sukses sa i përket marrëveshjes për të zhdukurit me dhunë”, thuhet në njoftim.

Ndryshe, dje Përfaqësuesi i Lartë për Politikë të Jashtme dhe Siguri i BE, Josep Borrell, u takua në New York me gjashtë liderët e Ballkanit Perëndimor.

Ai tha se ka biseduar me ta për ndikimin që po ka në rajon dhe botë pushtimi i paprovokuar rus i Ukrainës, si dhe u ka premtuar atyre se blloku evropian do t’u ndihmojë për të rritur sigurinë energjetike dhe për të adresuar “kërcënimet hibride, përfshirë ato kibernetike”.