Nga “Foltorja” me të rinjtë, Berisha: S’lejoj që Basha të japë dorëheqje, do ta heqim!
Për “Foltoren” madhështore që u zhvillua sot me të rinjtë e FRPD në Amfitheatrin e Akademisë së Arteve në Tiranë padyshim që meritat më të mëdha i ka Kryetari i PD Lulzim Basha me veprimet e tij autoritare ndaj këtij Forumi i cili ndonëse u rrit me figurën e Bashës, shpëtimin e gjeti te lideri historik i Partisë Demokratike për të cilin deri para pak ditësh kishin dëgjuar rrëfime dhe asgjë nga këto nuk i kishin shijuar.
Ish-Presidenti Sali Berisha renditi dështimet e qeverisë së Edi Ramës ndërsa rrëzimin e saj ai e sheh vetëm me të rinjtë e FRPD ndonëse strukturën e saj Kryetari i PD, Lulzim Basha, e bëri nul dhe shpalli zgjedhjet arbitrare për ti zëvendësuar këta të pabindur që morën guximin të shkelin në “Foltore”.
Kryetari i Forumiti Rindor të Partisë Demokratike, Belind Këlliçi, tha se FRPD është themeli i Partisë Demokratike ndërsa thirrja publike e Sekretarit Rigels Muçollari drejtuar Lulzim Bashës që ti jep fund marrëzisë dhe të jap dorëheqje sepse çdo minutë e tij i jep oksigjen korrupsionit, varfërisë dhe Edi Ramës kishte një përgjigje nga lideri historik i PD, Sali Berisha, që kishte në krah: S’e lejoj me dhënë dorëheqje, do ta heqim!
Fjalën në këtë “Foltore” lideri historik Sali Berisha e nisi me një falënderim për të rinjtë e FRPD:
“Dua t’ju falënderoj për punën e jashtëzakonshme që keni bërë, për mundin dhe djersën, guximin që keni treguar për të bërë PD një opozitë të vërtetë. Ju anëtarë dhe anëtare, drejtues të Forumit Rinor nuk kursyer asgjë në këto vite, por u përballët më dhunën dhe terrorin e narko-shtetit. U përballët me egërsinë e narkopolicisë së tij, me shëmtinë e qelive, të burgjeve dhe komisariateve për të mbrojtur idealet e PD-së, liritë dhe vlerat e saj, për të mbajtur në këmbë një opozitë e cila duhej t’ju printe shqiptarëve drejt fitores. Për mua ky takim, kjo foltore është më e rëndësishmja, vendimtare në përpjekjen tonë për një rindërtim të plotë të PD-së, për shtrimin e saj në një opozitë të vërtetë shqiptare, në një forcë të sigurt të fitores. Ju garantoj ju se besimin tim e kam të bazuar sepse unë e di që ju jeni vajza dhe djemtë e idealeve më të pastra të shoqërisë shqiptare. Kjo sepse unë e di dhe jam i bindur se ju jeni të rinjtë me ëndrrat më të bukura për veten dhe Shqipërinë. E di se te ju gurra e energjisë është një shatërvan i pandalshëm. Besoj shumë se kjo Foltore do të jetë një shtytje e madhe për shoqërinë shqiptare dhe PD, e cila ndodhet në këto momente në moment kritik.
Kam bindjen, jam i sigurt se së bashku do të krijojmë me shpejtësi opozitën e vërtetë shqiptare. Dhe një lloj si 30 vite më parë nënat dhe baballarët tuaj përmbysën diktaturën komuniste, ne do të përmbysim narko-shtetin e bazuar në krim e drogë, korrupsion. Ne do të shembim muret dhe do të përmbysim këtë regjim, i cili më armik se me këdo tjetër është me të rinjtë shqiptarë. Ju ftoj ju, pavarësisht nga bindjet politike. Këta ministra tenderojnë pune publike me çmime 8 herë më të larta se sa punët që tenderohen me paratë e BE. Duke qenë me lidhje të fuqishme krimi, ata kanë frikë. Ndaj edhe mbyllën më gjatë se Europa universitetet për të brohoritur; rroftë Covid-i. Bëjnë gjithçka të tmerruar në pallatet e tyre të krimit që të fshihen nga ju,” tha Sali Berisha duke shtuar se kjo është ora juaj, mjerë ata.
“Ne në këtë betejë kemi dhe problem të forta të brendshme si PD. Peng kryetari ka humbur çdo lloj morali drejtues dhe se fundi është vërsulur ndaj organizatës suaj dhe organizatës së grave demokrate në një hakmarrje të turpshme primitive. Vendi i tij po të ishte burrë, do të duhej të ishte para jush. Duhet të ishte këtu, me Belindin dhe Rigelsit, në një debat të hapur, por i kyçur në zyrën e tij jep urdhra me telefon dhe deklaron si dikur uzurpinim e FRPD-së, uzurpimin e Lidhjes së Grave. Forumi juaj ka statusin e vetë, themelimin dhe organizimin e vetë dhe nuk është pronë. Askush nga ju nuk është kundër zbatimit të statutit, dhe kundër proceseve zgjedhore në radhët tuaja, por ato janë kompetencë e juaja, ekskluzive. Vetëm e juaja! Do jeni ju që do të zhvilloni ju procesin zgjedhor se si do t’i zgjidhni drejtuesit. Kryetari pa parti nuk përcakton dot asgjë, atë e ka kapur një frikë e tmerr nga anëtarësia, nga ju dhe zonjat dhe zonjushat e PD. Është krejtësisht i pashpresë,”
Gjithsesi, Berisha i sugjeroj që ta ftojnë Lulzim Bashën në një debat që mos të fshihet:
“Të dalë ballë për ballë dhe të mësojë nga ju ABC-në e demokracisë. Po sillet sikur është shkolluar në Korenë e Veriut dhe jo në Holandë. Në këtë përpjekje kërkon mbështetjen tuaj, që ta bëjmë PD shtëpinë e lirisë për demokratët shqiptarë. Të rikthejmë votën, respektin për votën e lirë, forumet në PD, të cilat kryetari i shkelmon. Të rivendosim pavarësinë e FRPD dhe Lidhjes së Gruas, që kanë pavarësinë e pacënueshme. Të ngrihemi si opozitë siç po ndezim shpresat në zemrat e demokratëve. Ne duhet t’i ndezim ato në zemrat e mbarë shqiptarëve,” tha lideri historik Sali Berisha duke përfunduar:
“Sot dy janë problemi madhor i Shqipërisë, shpressëvrasësi ose kreu i meduzës, dhe shpresëshuesi, pengu u tij Lulzim Basha, i cili i marrë peng merr çdo lloj vendimi që i dikton pengmarrësi.”
Belind Këlliçi: FRPD, themeli i shtëpisë sonë, PD-së!
Fillimisht Kryetari i FRPD-së, Belind Këlliçi, falënderoi anëtarët e Forumit Rinor duke theksuar se janë themeli i Partisë Demokratike, dhe kushdo që vë një shenjë barazimi midis atyre që rrezuan diktaturën dhe atyre që krijuan narkoshtetin gabon shumë.
“Dua ta nis fjalën time me një falënderim për të çdo të riu të FRPD-së që nuk kanë lënë asnjë rrugë, lagje e pallat për të sjellë PD në pushtet, e kështu të sjellim shpresën e shqiptarëve. Mandati im nuk është i përjetshëm, por FRPD është anëtarë e të gjithë organizatave europiane të rinisë.
Jemi themeli i shtëpisë tonë, Partisë Demokratike. Ju jeni ata që nuk e harrojnë historinë e Partisë dhe të liderit, Sali Berisha. Kushdo që vë një shenjë barazimi midis atyre që rrezuan diktaturën dhe atyre që krijuan narkoshtetin gabon shumë,” tha Kryetari i FRPD, Belind Këlliçi duke përfunduar:
“Partia Demokratike është partia e fjalës së lirë. Dita që të flisni ju e jo unë. Ju falënderoj përjetësisht!”
Ndërsa Sekretari i FRPD, Rigels Muçollari, i bëri Kryetarit të PD që të jep dorëheqje një orë e më parë.
“Zoti Basha po intimidon PD, dhe FRPD-në që anëtarët mos të jenë më pjesë e saj. Dua t’i drejtoj një thirrje publike. Zoti Basha, jepini fund marrëzisë, jepni dorëheqje një minutë e më parë. Çdo minutë e jotja i jep oksigjen korrupsionit, varfërisë dhe Edi Ramës. Zoti Basha, jepni dorëheqje dhe ruaj një fije dinjitet për veten tuaj,” thirrje të cilës lideri historik Sali Berisha iu përgjigj në çast:
“S’e lejoj me dhënë dorëheqje, por do ta heqim. Nuk e lejoj!”
Ndërkohë Berishah foli dhe për Këlliçin të cilin Basha e shihte si rrezik që mund t’i zinte vendin në vitin 2017.
“Ai ka qëndruar besnik traditës familjare, por edhe juve. Edhe në kohën kur ju bën jashtë çdo lloj konteksti, arsye, padrejtësitë më të mëdha. Belindi nuk u lëkund nga ju. Belind Këlliçit iu mohua mundësia që t’ju përfaqësuar në parlament, jua them unë se ai pati frikë se e shikonte Këlliçin si rrezik potencial për t’i zënë vendin.”
Në fund, lideri historik i Partisë Demokratike, Sali Berisha, tha se shkarkimi i Lulzim Bashës mund të bëhet në Kuvendin e 11 Dhjetorit por dhe me votën e të rinjve demokratë.
“Ju garantoj se Kuvendi, qëllimin më madhor ka rivendosjen, rikthimin e PD përmes normave të qarta, në shtëpinë e lirisë. Kuvendi do të sanksionojë nene në të cilat kryetari, cilido qoftë ai nuk do të guxojë që të shkel normat statutore. Kryetari s’do të guxojë të cënojë organizatat partnerë dhe të sillet si padroni i tyre. Kuvendi i ka të gjitha fuqitë e shkarkimit të kryetarit dhe çdo fuqi tjetër. Kuvendi përgjigjen e parë duhet të japë ndryshimet e thella statuore. Meqë kryetari është zgjedhur me votën e anëtarësisë, shkarkimi i Bashës përveç se nga Kuvendi, duhet të bëhet me votën tuaj në mbarë Shqipërinë. Ose afirmimi i tij, skam kundërshtim. S’do të kundërshtojë kurrë verdiktin. Qëllimi i kryesor është që vota juaj të jetë e lirë.”
Kjo “Foltore” me të rinjtë nuk e kishte se si përfundonte më mirë se me fjalën e Glauk Olldashit, djalit të Ish-Kryetarit të ndjerë të FRPD, Sokol Olldashi:
“Ne duam të vijmë në pushtet për të gjithë shqiptarët dhe për ta bërë një vend të lirë. Ne jemi kundër një modeli autoritar, socialist. Për të mundur këtë model, nuk mund ta bëjmë atë duke e mbyllur PD, por duke e hapur. Ne duhet të bëhemi model për të gjithë shqiptarët,” tha Glauk Olldashi duke përfunduar:
“Nuk ka se kush ti përfaqësojë më mirë vlerat e PD-së, se sa forumi rinor i Partisë Demokratike.”
