Ngarkesa tatimore më 2020, zhvendoset në gjysmën e dytë, ja sa taksa do të paguajmë çdo muaj
Gjysma e dytë e vitit 2020 rrit ngarkesën fiskale për bizneset sipas të dhënave nga Ministria e Financave mbi shpërndarjen mujore të planit vjetor te të ardhurave buxhetore. Barra fiskalë vjen e rritet pas muajit korrik deri në dhjetor ku bizneset dhe individët do të paguajnë 44-45 miliardë taksa në muaj në raport me 35 -43 miliardë lekë për muaj që paguajnë në gjysmën e parë të vitit.
Ngarkesën më të lartë fiskale e ka muaji dhjetor me rreth 51.8 miliardë lekë. Dhjetori historikisht ka ngarkesë të lartë fiskale për shkak të qarkullimit dhe konsumit më të lartë të mallrave dhe shërbimeve këtë muaj si pasojë e sezonit të festave.
Plani i grumbullimit te të ardhurave sipas muajve është bërë në bazë të intensitetit të aktivitetit ekonomik në vend. Dy muajt e parë të vitit përgjithësisht ekonomia qarkullon më pak dhe gjatë këtyre muajve nuk paguhen këstet e tatimit mbi fitimin. Ngarkesa fiskale është e përqendruar më së shumti në gjysmën e dytë të vitit.
Në gjashtëmujorin e parë janë programuar të vilen rreth 240 miliardë lekë të ardhura tatimore, ndërsa në 6-mujorin e dytë do të grumbullohen 269 miliardë lekë.
Programimi i të ardhurave për vitin 2020, mbështet synimet e Ministrisë së Financave dhe Ekonomisë për konsolidim fiskal, reduktim të deficitit buxhetor dhe borxhit publik. Programi bazohet në përmirësimin e administrimit fiskal nëpërmjet implementimit të projektit të fiskalizimit, dhe minimizimin e informalitetit në ekonomi, duke mbështetur në këtë mënyrë rritjen ekonomike të qëndrueshme, nëpërmjet nxitjes së prodhimit dhe eksporteve.
Në programimin e të ardhurave nga Tatimet dhe Doganat për vitin 2020, janë marrë në konsideratë faktorët kryesorë me ndikim në buxhet, përfshirë efektin e rritjes ekonomike dhe indeksit të çmimeve, politikat e reja fiskale si dhe efektet nga lufta kundër informalitet, e shoqëruar kjo me masa ligjore antishmangie me qëllim rritjen e nivelit të pajtimit vullnetar të tatimpaguesve me ligjin.
Të ardhurat tatimore qe mblidhen nga administrata tatimore dhe ajo doganore në vitin 2020 programohet të jenë 334,12 miliard lekë, me rritje +6,42 % ose 20,16 miliard lekë krahasuar me faktin e 2019.
Të ardhurat nga kontributet e sigurimeve shoqërore dhe shëndetësore parashikohen të jenë 103 miliard lekë, +4,8 %, ose 4,7 miliard lekë krahasuar me të pritshmin e vitit 2019.
Të ardhurat doganore janë parashikuar duke u bazuar në analizën e trendit historik të 60 grup-produkteve kryesore, për një periudhë katër-vjeçare. Ky parashikim është korrektuar me efektet e faktorëve të tjerë të jashtëm për secilën taksë. E njëjta procedurë është ndjekur edhe për të ardhurat nga tatimet, duke marrë për bazë modelin statistikor të projeksionit të të ardhurave të pritshme si dhe faktorët ekzogjenë me ndikim në çdo taksë.
Faktorët e jashtëm të marrë në konsideratë të cilët ndikojnë në rritjen e të ardhurave për vitin 2020 janë rritja nominale e Prodhimit të Brendshëm Bruto e skontuar me Koeficientin e Elasticitetit, është aplikuar duke analizuar këtë efekt në mënyrë të integruar me faktorë të tjerë për çdo taksë në veçanti, të ndërlidhur me të dhënat historike dhe projeksionet e çmimeve në tregjeve ndërkombëtare tek taksat ad-valorem si Tatimi mbi Vlerën e Shtuar, Renta minerare dhe Taksa doganore, sipas financave.
Për vitin 2020 nuk janë parashikuar ndryshime themelore fiskale. Prioritet do jetë zbatimi dhe matja e efekteve të politikave fiskale të miratuara ne 2-3 vitet e fundit, me qëllim konsolidimin e sistemit tatimor.
Ndryshimi kryesor ka të bëjë me ligjin e fiskalizimit, i cili pritet të ndikojë në transparencën dhe kontrollin e transaksioneve tregtare, nga ku gjenerohen detyrimet tatimore. Marrja në kohë reale e transaksioneve biznes-konsumator si dhe me pas e atyre biznes-biznes nëpërmjet përdorimit të faturës elektronike, synon që brenda një periudhe 2-3 vjeçare, të rrisë parametrat e TVSH-së së brendshme nga 8,8 % e PBB-së, në 9,1 % të saj./Monitor/
