Ngjarja e rëndë në Himarë, Berisha: Krim i mirëfilltë shtetëror!

Duke e cilësuar ngjarjen e rëndë në Himarë si krim të mirëfilltë shtetëror, Kryetari i Partisë Demokratike, Sali Berisha, e nisi sot konferencën e përjavshme duke falënderuar qytetarët për protestën i kërkoj Edi Ramës të shkarkojë menjëherë të dy ministrat për të cilët protestuesit i dhanë 72 orë afat.

“Dua të falenderoj të gjithë qytetarët, të cilët organizuan vetë një protestë qytetare, të madhe për një çeshtje thellësisht tronditëse për shoqërinë shqiptare dhe për çdo vend ku do kishte ndodhur. Të dhënat që dalin rreth këtij problemi, gjithçka flet për një krim të mirëfilltë shtetëror. Skafi ishte me të gjitha ligjet, i ndaluar të përdorej aty ku u ndodh. Skafisti ishte i palicencuar për përdorimin e skafit,” tha Sali Berisha duke bërë të ditur se skafi i krimit kishte pronar Adhurim Kushin, një nga çunat e Taulant Ballës në Londër. Pra, e kuptoni vetë origjinën e skafit. Adhurim Kushi punon akoma në Britani dhe blen skaf ndërsa akuzoi Ministrin e Brendshëm si anëtar i një shoqate trafikantësh dhe kontrabandistësh.

“Arjan Tase, me origjinë nga Përmeti, u rikthye në detyrë nga dy ministrat. Ai nuk plotësonte asnjë kusht, përveç lidhjeve të forta me dy ministrat. Të dhënat tjera janë shumë tronditëse. Ministri i Brendshëm apo ministri i familjes, rezulton të jetë anëtar i një shoqate të mbushur me trafikantë dhe kontrabandistë, për të cilët media ka nxjerrë emra dhe fakte,” tha Berisha duke e akuzuar Çuçi shpirtkazëm se nuk gjeti asnjë fjalë për ngushëllim.

“Pas tre ditësh, Bledi Veltari, në mënyrën më të papranueshme, shkon në verbërinë e tij dhe shpirtkazmërinë e tij, nuk gjen dy fjalë për të shprehur ngushëllim për familjen. Shikoni deri në çfarë shkalle arrin çnjerëzia e këtyre ministrave të degraduar. Bën një status të gjatë, që e fillon e mbaron me Sali Berishën, dhe nuk gjen një hapësirë minimale për familjen që humbi fëmijën pikërisht për shkak të këtij soj ministri.”

Me këtë rast, Kryetari i PD denoncoi se janë bërë përpjekje të mëdha për të fshehur gjurmët e krimit.

“Jo vetëm autori tentoi të largohej, por janë zhdukur edhe kamerat që regjistruan skenën e krimit. Persona, kriminelë njësoj si Arjan Tase, kanë marrë kamerat menjëherë dhe i kanë zhdukur,” tha Berisha duke i kërkuar Edi Ramës të shkarkojë menjëherë të dy ministrat.

“Ky është hapi më minimal. Qytetarët janë të revoltuar. Nuk mund ta kapërcejë Edi Rama me halucinacione, me vampirë politikë e mediatikë. Me këtë mbrojtje, Rama meriton një revoltë të madhe popullore. Në vend të një ndjese qindra herë përpara shqiptarëve, deklaron se kemi organizuar sezonin më të përsosur. Se si mund të flitet për përsosmëri, kur ndodhin krimet më makabre, atë e din vetëm mendja e tij. I përgëzoj edhe njëherë qytetarët. Ata i kanë lënë qeverisë 72 orë për të reflektuar. Uroj të merren vendimet e duhura. Por natyrisht, PD mbështet fuqishëm protestën e drejtë të qytetarëve për një krim të rëndë shtetëror.”

Në këtë situatë, Berisha jep alarmin se turizmi po falimenton.

“Nga Velipoja deri në Ksamil, kapacitet janë nën 50 përqind. Mungojnë jo vetëm turistët e huaj, por mungojnë turistët shqiptarë. Një nga shkaqet më dekurajuese për shqiptarët dhe për ata që duan të vijnë në Shqipëri, është çmimi i naftës, i barabartë me Zvicrën. Ju e dini se për të shkuar me makinë nga Tirana deri në Dhërmi, harxhon naftë 130 mijë lekë, por për të fluturuar me EasyJet, nga Tirana në Antalia, harxhon gjithsej 60-70 euro. Këtu ka një paradoks, një çmenduri që po godet rëndë turizmin. Ky është vetëm një faktor. Shqiptarët e kanë shumë më lirë sot të pushojnë në Greqi, Turqi apo Mal të Zi, sesa të zbresin në brigjet e tyre, me çmimin stratosferik të naftës, por edhe çmimet e produkteve ushqimore. Janë dy-trefishuar,” tha lideri demokrat në këtë konferencë të përjavshme duke shtuar se ndërsa turizmi po falimenton duhen masa urgjente.

“Keni dëgjuar ndonjë masë të vetme nga qeveria për të mbështetur turizmin? Punëson një çerek milionë qytetarë në sezon. Nuk gjejnë punonjës dhe punëtorë. Ky njeri ka ndërmend të sjellë punëtorë nga Bangladeshi, sepse po i largon të vetët. Ky që blen like nga Bangladeshi, standardet e botës virtuale, po i përdor për botën reale. Ndërhyrja emergjente është e domosdoshme. Duhet indeksim urgjent sepse në këtë mënyrë po falimenton sektori ku shqiptarët kanë investuar pothuajse gjithçka kanë pasur. Kam këtu foto që janë të frikshme po t’ua tregoj. Turizmi në Shqipëri po pëson një dramë të madhe si shkak i politikave të Edi Ramës,” tha Berisha duke rikujtuar se Opozita e ka shpallur armik Edi Ramën dhe nuk e lëvizim atë.

“Kjo është një periudhë ku ai vazhdon me metodat e tij grabitqare, kjo nuk do thotë se kemi hequr dorë nga beteja. Ne do mobilizohemi dhe do i japim atij atë që meriton. Epiqendër e betejës sonë do jetë çështja e djegësve. Ky zotëri ka firmosur në kundërshtim me ligjet e vendit tenderin me negociata të mbyllura, tenderin për vjedhje. Ky është përgjegjësi numër 1. Ky nuk mund të shpëtojë, ky i ka kohërat e numëruara. Djegësit aty ku djegin plehrat, do djegin qeverinë e tij.”

Në fund, kryetari i PD, tha se asgjë nuk e nxit më shumë revoltën sesa bllokimi i drejtësisë, dhe këtë po e bën Edi Rama:

“Drejtësia dhe shteti ligjor janë mekanizmi institucional dhe kushtetutes më efikas për të parandaluar revoltat. Asgjë nuk e nxit më shumë revoltën sesa bllokimi i drejtësisë. Këtë po e bën Edi Rama, nuk po e bën opozita. Ju jeni dëshmitarë të sulmeve të tij publike pa precedent kundër SKAP-it të partisë. Siç duket SKAP kishte vendosur të ndalonte ndonjë, Agaçin apo Arben Ahmetajn. Dhe ju e patë se çfarë presioni iu bëri. Sigurisht SKAP-in mund të tulatë, mund ta bëjë të heshtë. Por jo popullin. Populli është populli dhe kërkon ndëshkimin. Nuk ka më opozitë që të mbyllë sytë para këtyre akteve,” u shpreh kryetari i PD, Sali Berisha duke përfunduar:

“Që tani, inspektorët kanë nisur fushatën dhe ne po e ndjekim. Por të jetë i bindur se po bën një gabim fatal. Ai të vazhdojë, edhe ne do vazhdojmë me mënyrat tona. Skenari ynë është protestë qytetare, civile me të gjitha mjetet, në rast nevoje të mosbindjes civile. Në këtë limit mbetet kryengritja paqësore që do të vijë. PD ka një armik, ai është Edi Rama. Por PD ka arritur në një hark kohor, relativisht të shkurtër, në kulmin e saj, kulmin e fuqisë së saj si forcë e vërtetë opozitare. 7 korriku ishte dëshmia më magjepsëse, më madhështore e kësaj që unë them. Tani duhet arritur shumica e heshtur. PD do punojë me gjithë potencialin e saj për të arritur shumicën e heshtur.”