Ngjarje e rëndë në Qendrën Tregtare Megatek Tiranë, aksidentohet dhe ndërron jetë një punëtor

Në Qendrën Tregtare Megatek në Tiranë sot ka ndodhur një ngjarje e rëndë, ku një 32-vjeçar pasi është aksidentuar nga një mjet pune, pirun, por nuk i ka mbijetuar plagëve të rënda dhe ka ndërruar jetë në Spitalin e Traumës.

Ngjarja ka ndodhur paraditen e sotme, në ambientet e jashtme të Qendrës Tregtare Megatek.

Drejtuesi i mjetit është shoqëruar në komisariat, ndërsa policia ka nisur hetimet për zbardhjen e plotë të ngjarjes.

Tiranë/Informacion paraprak

Paraditen e sotme, në ambientet e jashtme të një qendre tregtare, dyshohet se shtetasi L. D., 32 vjeç, punonjës i kësaj qendre tregtare, është dëmtuar aksidentalisht nga një mjet pune (pirun) që drejtohej nga shtetasi E. D., 61 vjeç.

Shtetasi L. D. është dërguar në Spitalin e Traumës dhe pas disa orësh ka ndërruar jetë, për shkak të plagëve të marra.

Shtetasi E. D. është shoqëruar në Komisariat, për kryerjen e veprimeve procedurale.

Grupi hetimor vijon punën për dokumentimin e plotë të rrethanave të ngjarjes.