Ngritja e SPAK, Gent Ibrahimi: Jemi pranë finalizimit…

Ngritja e Strukturës së Posaçme kundër Korrupsionit dhe Krimit të Organizuar, SPAK, është pranë finalizimit! Këtë e ka konfirmuar sot Kryetari i Këshillit të Lartë të Prokurorisë, KLP, Gent Ibrahimi, duke shtuar se në garë janë 15 kandidatë por se do diskutohet nëse SPAK mund të ngrihet me një numër minimal anëtarësh, vendim që do merret nga Këshilli.

“Ne sot nisim sezonin e ri të punës të Këshillit të Lartë të Prokurorisë. Padyshim që në fillim të këtij sezoni shpresojmë të finalizojmë procesin afatgjatë të ndërtimit të Prokurorisë së Posaçme. Ne në këtë moment, nga ai grup prej 15 prokurorësh që kemi përzgjedhur si kandidatë për në SPAK presim verifikimin e kushtit të fundit që është kalimi prej tyre i procesit të vettingut. 5 prej tyre e kanë kaluar plotësisht dhe mund të emërohen çdo çast nga ana jonë, sidoqoftë ne presim një numër të arsyeshëm. Se çfarë është ky numër i arsyeshëm do të jetë vendim i Këshillit.”

Gent Ibrahimi tha se Këshilli do të mblidhet, do të gjykojë se çfarë është një numër i arsyeshëm.

“Ne kemi një indikacion në Kushtetutë që flet për një numër prej 10 prokurorësh, ne dhe më herët kemi diskutuar që numri mund të jetë dhe më i pakët. Në marrjen e këtij vendimi, Këshilli do të thellohet duke parë ngarkesën aktuale të prokurorëve të Prokurorisë së Krimeve të Rënda, ngarkesën e pritshme të prokurorëve të SPAK. Ne kemi statistika të sakta për këtë, duke pasur parasysh portofolin e veprave penale që do të hetojnë prokurorët e SPAK-ut, portofolin e veprave penale që hetojnë prokurorët e Krimeve të Rënda, pra do të bëjmë një llogari të bazuar në shifra. Pra do të bëjmë një llogari të bazuar në shifra, për të dalë me një vendim se cili do të jetë numri optimal për ta nisur SPAK-un. Padyshim që pastaj që në muajt në vijim e në vitet në vijim, struktura do të plotësohet me prokurorë të tjerë por vendimi për fillimin do t’i mbetet Këshillit, bazuar në këto të dhëna që ne disponojmë”, tha Ibrahimi për News24 duke saktësuar se KLP mund të mblidhet për të diskutuar për SPAK-un dhe për të marrë një vendim qoftë dhe me një numër minimal, e kjo mund të ndodhë brenda 2-3 javësh.

“Padyshim që ne e ndiejmë peshën e përgjegjësisë dhe nevojën urgjente për të ecur përpara me ndërtimin e institucioneve të reja. Ka një vonesë të përgjithshme që lidhet me komleksitetin e reformës dhe me procedurat ekzigjente që parashikon ajo për përzgjedhjen e kandidatëve për këto pozicione kyçe por besoj që jemi afër finishit. Në kuptimin që 10 kandidatë për SPAK janë drejt finalizimit, 5 e kanë finalizuar garën, 5 të tjerë janë në një fazë të avancuar kështu që unë mendoj që për momentin ne do të jemi ende në pritje për 2-3 javë. Në pritje të ecurisë së procesit të vettingut kur një grup prej 7-8-9-10 kandidatësh nga ky grup prej 15 kandidatësh të përzgjedhur prej nesh ta kalojnë vettingun, besoj që Këshilli do të mblidhet posaçërisht për të vendosur krijimin e Prokurorisë së Posaçme.”

Ibrahimi me këtë rast sqaron pse 5 kandidatët që kanë kaluar vettingun nuk emërohen nga KLP.

“Ne mund t’i emërojmë secilin prej atyre të pestëve që e kanë përfunduar procesin e vettingut që sot por kjo do të ishte jo inteligjente duke pasur parasysh vëllimin e punës që i pret ata. Duhet bërë një llogari e tillë që prokurorët e rinj të Prokurorisë së Posaçme të kenë një ngarkesë të arsyeshme pune. Pra, vetëm 5 prokurorë janë tepër pak për të përballuar ngarkesën e pritshme të Prokurorisë së re,” tha Gent Ibrahimi i cili mungesën e dorëheqjeve të prokurorëve para vettingut e vlerëson si një shenjë të mirë.

“Unë besoj që për prokurorët, për magjistratët në përgjithësi procesi i vettingut është një shans i mirë për të konfirmuar integritetin e tyre, kështu që në këtë kuptim dorëheqjet nuk janë një shenjë e mirë. Është shenjë pozitive që nuk ka pasur shumë të tilla.”