Nuk e përballon humbjen/ Tenisti Novak Gjokoviç largohet nga US Open

Tenisti serb, Novak Gjokoviç është larguar nga gara e turneut US Open, për shkak të, siç tha ai, një lëndimi gjatë lojës kundër zviceranit, Stan Wawrinka.

Gjokoviç, 32-vjeçar është larguar pas një problemi me krahun.

“Më vjen keq për publikun. Ata kanë ardhur që të shohin gjithë lojën mirëpo nuk u realizua,” tha kampioni aktual, raporton RFE.

Mirëpo ndeshjen ishte duke dominuar Wawrinka, pasi rezultati ishte 6-4, 7-5, 2-0, në të mirë të tij, kur Gjokoviç vendosi që të mos vazhdojë më garën.

“Më vjen keq që ai u largua nga loja ashtu, mirëpo për mua, më e rëndësishmja është mënyra si luaj unë, si lëviz”, ka thënë Wawrinka.

“Sa më shumë që zhvillohej loja, më mirë luaja. Isha duke goditur topin shumë ashpër. Ndihesha në mënyrë fantastike në fushë,” ka shtuar ndër të tjera ai.

Wawrinka, 34-vjeçar do të përballet me rusin, Daniil Medvedev në çerek-finale.

Ndryshe, Novak Gjokoviç pësoi humbje nga Medvedev më 18 Gusht në ATP Masters 1000 Cincinnati, ku gjithashtu nuk arriti ta mbroj titullin e kampionit nga viti 2018, por atje u ankua se kishte dhimbje kyçi.